فرانس کا ایران پر سپر مارکیٹوں کے فریج ہیک کرنے کا الزام

فرانس نے باضابطہ طور پر ایران پر الزام عائد کیا ہے کہ وہ سپر مارکیٹوں کے ریفریجریٹرز اور فریپرز کو نشانہ بنانے والے سائبر حملوں کے پیچھے ملوث تھا۔ ایک پریس کانفرنس سے خطاب کرتے ہوئے فرانسیسی وزیر خارجہ ژان نوئل باروٹ نے دعویٰ کیا کہ یہ کارروائی ایران کے پاسداران انقلاب نے انجام دی ہے۔

دستاویزات اور سرکاری بیانات کے مطابق، یہ حملہ اپنی وسعت اور جارحیت کی سطح کے لحاظ سے بے مثال تھا، جس کے بعد فرانسیسی حکومت نے اس حملے میں ملوث افراد کے خلاف یورپی سطح پر پابندیاں نافذ کرنے کا تہیہ کیا ہے۔ گزشتہ ماہ رونما ہونے والے اس سائبر حملے کی وجہ سے فرانس بھر کے سینکڑوں سپر مارکیٹوں میں موجود فریج اور فریزر گرم ہو گئے تھے، جس کے نتیجے میں لاکھوں یورو مالیت کا تازہ اور منجمد خوردنی سامان خراب ہو گیا تھا۔

ادھر گزشتہ ہفتے دیگر 7 یورپی ممالک میں بھی درجنوں سپر مارکیٹوں کو ایسے ہی سائبر حملوں کا نشانہ بنایا گیا تھا، تاہم فی الحال یہ واضح نہیں ہو سکا ہے کہ آیا یہ تمام واقعات باہم جڑے ہوئے ہیں یا نہیں۔ ایرانی حکام کی جانب سے تاحال وزیر خارجہ کے ان الزامات پر کوئی ردعمل سامنے نہیں آیا ہے۔

علاوہ ازیں، پیر کے روز پیرس کے پراسیکیوٹر نے بتایا کہ ایران کے پاسداران انقلاب سے وابستہ ایک جارحانہ سائبر یونٹ کے سربراہ کے خلاف باضابطہ تفتیش کا آغاز کر دیا گیا ہے۔ حکام کا کہنا ہے کہ معاملے کی مزید تحقیقات جاری ہیں اور جلد ہی نئے حقائق سامنے لائے جائیں گے۔