محمود اچکزئی سے بیرسٹر گوہر کی ملاقات، بانی پی ٹی آئی کا پمز اسپتال میں طبی معائنہ

تحریک تحفظ آئین پاکستان کے پلیٹ فارم پر سیاسی سرگرمیاں تیز ہو گئی ہیں جہاں چیئرمین پاکستان تحریک انصاف بیرسٹر گوہر اور اسد قیصر نے محمود خان اچکزئی سے ان کی رہائش گاہ پر ملاقات کی۔ ملاقات کے بعد جاری کردہ اعلامیے کے مطابق رہنماؤں نے بانی پی ٹی آئی کی صحت، عدالتی فیصلوں اور زیر حراست رہنماؤں کی رہائی سے متعلق شدید تشویش کا اظہار کیا۔

اعلامیے میں مطالبہ کیا گیا کہ سپریم کورٹ کے 18 اگست کے فیصلے پر فوری اور مکمل عملدرآمد کیا جائے۔ تحریک تحفظ آئین پاکستان نے بانی پی ٹی آئی کو شفا انٹرنیشنل اسپتال اسلام آباد منتقل کرنے اور انہیں معیاری طبی سہولیات فراہم کرنے کا پرزور مطالبہ کیا۔ دریں اثنا، پمز اسپتال انتظامیہ کی جانب سے جاری کردہ اعلامیے کے مطابق 10 اور 11 نومبر کی درمیانی شب بانی پی ٹی آئی کو اڈیالہ جیل سے طبی معائنے کے لیے پمز اسپتال منتقل کیا گیا تھا۔ اسپتال ذرائع کے مطابق عمران خان کا طبی معائنہ اور آنکھوں کا فالو اپ ٹریٹمنٹ کیا گیا جہاں ماہر امراض چشم کی ہدایت پر ان کی آنکھ میں انجکشن لگایا گیا۔ علاج کے بعد رات گئے بانی پی ٹی آئی کو واپس اڈیالہ جیل منتقل کر دیا گیا۔

ملاقات کے دوران رہنماؤں نے وفاقی آئینی عدالت کی جانب سے پشاور ہائیکورٹ کو مقدمات کی سماعت سے روکنے کے اقدام کو یکطرفہ قرار دیتے ہوئے اس کے خلاف وفاقی آئینی عدالت میں باقاعدہ پٹیشن دائر کرنے کا اعلان کیا۔ بیرسٹر گوہر نے میڈیا سے گفتگو کرتے ہوئے کہا کہ ان کی خواہش تھی کہ مولانا فضل الرحمان کے ساتھ اتحاد بنے، تاہم مولانا کے ساتھ مل کر تحریک چلانا ابھی قبل از وقت ہے۔ انہوں نے مزید کہا کہ اسلام آباد ہائیکورٹ کا جیل میں ملاقاتوں سے متعلق حکم خوش آئند ہے اور بلدیاتی انتخابات میں بھرپور حصہ لیا جائے گا۔