پاکستان نے بنگلادیش کو شکست دے کر ساف فٹبال چیمپئن شپ کے فائنل میں رسائی حاصل کرلی
تاریخی کامیابی، سیمی فائنل میں شاندار کھیل پیش کیا، فائنل میں بھارت سے مقابلہ ہوگا
ساف فٹبال چیمپئن شپ کے سیمی فائنل میں کامیابی کے بعد پاکستانی کھلاڑی جشن منا رہے ہیں۔
پاکستان فٹبال ٹیم نے نئی تاریخ رقم کرتے ہوئے بنگلادیش کو شکست دے کر پہلی بار ساف فٹبال چیمپئن شپ کے فائنل میں جگہ بنالی ہے۔ ڈھاکا کے نیشنل اسٹیڈیم میں کھیلے گئے ساف فٹبال چیمپئن شپ کے سیمی فائنل میں پاکستان نے میزبان بنگلادیش کو 0-1 سے شکست دے کر یہ سنگ میل عبور کیا۔
میچ کے دوران بنگلادیش کا بال پر زیادہ قبضہ رہا لیکن پاکستانی کھلاڑیوں نے شاندار دفاعی کھیل کا مظاہرہ کرتے ہوئے میزبان ٹیم کے تمام حملے ناکام بنائے۔ میچ کے 86 ویں منٹ میں عبدالصمد نے حریف دفاعی کھلاڑیوں کو چکمہ دے کر بائیں پاؤں سے شاندار گول اسکور کیا اور پاکستان کو فیصلہ کن برتری دلادی۔ آخری لمحات میں بنگلادیش نے مقابلہ برابر کرنے کی بھرپور کوشش کی، تاہم پاکستانی دفاع نے اپنی برتری کامیابی سے برقرار رکھی۔
میچ کے دوران تماشائیوں کی جانب سے ہنگامہ آرائی اور ناخوشگوار رویے کے واقعات بھی سامنے آئے جب کہ آخری لمحات میں بنگلادیشی پلیئرز بھی پاکستانی فٹبالرز سے الجھتے رہے لیکن پاکستان ٹیم نے اعصاب پر قابو پایا اور میچ کا اختتام پاکستان کی ایک صفر کی برتری پر ہوا۔ کوچنگ اسٹاف کے مطابق پاکستان ٹیم اب پہلی بار ساف چیمپئن شپ کا ٹائٹل جیتنے سے صرف ایک فتح دور ہے۔ پاکستان اور بھارت کے درمیان فائنل 17 نومبر کو کھیلا جائے گا۔
