11 اضلاع کے لیے ہائی اسپیڈ انٹرنیٹ،9 میگا پراجیکٹس منظور

اسلام آباد: ملک میں تیز رفتار انٹرنیٹ فراہم کرنے کے لیے 13 ارب روپے سے زائد مالیت کے منصوبے منظور کر لیے گئے ہیں۔

وزارت آئی ٹی و ٹیلی کمیونیکیشن کے ادارے یونیورسل سروس فنڈ کے بورڈ آف ڈائریکٹرز کے اجلاس میں ملک کے 11 اضلاع کے لیے ہائی اسپیڈ انٹرنیٹ، وائس کمیونیکیشن اور فائبر آپٹیکل کیبل کے 9 میگا پراجیکٹس کی منظوری دی گئی۔

سیکرٹری آئی ٹی اور چیئرمین بورڈ کے مطابق وفاقی وزیر آئی ٹی شزا فاطمہ کی ہدایت پر شہری اور دیہی ڈیجیٹل تفریق ختم کرنے کے اقدامات میں تیزی لائی جا رہی ہے۔

ان منصوبوں سے 55 لاکھ سے زائد افراد مستفید ہوں گے اور 11 اضلاع کے 178 ٹاؤنز و یونین کونسلز اور 753 دیہات کے مکین ڈیجیٹل دنیا سے منسلک ہو سکیں گے۔

چیئرمین یو ایس ایف بورڈ نے کہا کہ دیہی اور پسماندہ علاقوں میں انٹرنیٹ اور موبائل کنیکٹیویٹی سے ڈیجیٹل اکانومی کو فروغ ملے گا۔ پہلے سے جاری منصوبوں سے دیہی علاقوں کے 3 کروڑ 94 لاکھ افراد کو کنیکٹیویٹی سروسز تک رسائی حاصل ہو چکی ہے۔

سیالکوٹ، نارووال، زیارت اور کوئٹہ میں 3 منصوبوں کے تحت 1428 کلومیٹر فائبر آپٹیکل کیبل بچھائی جائے گی، جبکہ عمرکوٹ، گجرانوالہ، کوہاٹ، خضدار، مظفرگڑھ، مانسہرہ اور منڈی بہاءالدین میں براڈ بینڈ سروسز کے 6 منصوبے شامل ہیں۔

اجلاس میں چیئرمین پی ٹی اے میجر جنرل حفیظ الرحمان، ممبر ٹیلی کام جہانزیب رحیم، محمد یوسف اور عائلہ ماجد بھی شریک ہوئے۔