پاکستانی طالبہ نے امریکی محکمہ خارجہ کا ’’ایمرجنگ ینگ لیڈرز ایوارڈ‘‘ جیت لیا

امریکی محکمہ خارجہ نے پاکستان سے تعلق رکھنے والی دانیا حسن سمیت دنیا بھر کی 10 غیر معمولی صلاحیت کی حامل نوجوان لڑکیوں کو ’’ایمرجنگ ینگ لیڈرز ایوارڈ‘‘ سے نوازا۔ امریکی محکمہ خارجہ نے تقریب میں انہیں یہ ایوارڈ پاکستان میں تعلیم کے شعبہ میں مثبت سماجی تبدیلی لانے کیلئے کی جانی والی کوششوں کے اعتراف میں دیا۔ 18سالہ دانیا حسن نے جان ہاپکنز یونیورسٹی کے سمر اسکول میں یو ایس سمر سسٹرز ایکسچینج پروگرام کے ذریعے شرکت کی۔ یہ امر قابل ذکر ہے کہ یو ایس پاکستان وویمن کونسل نے ’’فن ٹو لرن‘‘ نامی تنظیم قائم کی جس کے ذریعے رضاکاروں پر مشتمل ٹیموں نے پاکستان کے پسماندہ علاقوں کے اسکولوں میں غیر نصابی سرگرمیوں کا انعقاد کیا۔ امریکا میں پاکستان کے سفیر اعزاز چوہدری نے خواتین کو بااختیار بنانے کیلئے یو ایس پاکستانوویمن کونسل کی کوششوں کی تعریف کی ہے۔ پاکستانی سفیر نے کہا کہ پاکستانی نوجوان اور خواتین زندگی کے مختلف شعبوں میں متحرک اور فعال کردار ادا کررہے ہیں۔ انہوں نے کونسل اور اس کے پارٹنرز پر زور دیا کہ وہ مستقبل میں تعاون کیلئے مزید مواقع تلاش کریں۔ اس سے قبل دانیا حسن کی کامیابی کے حوالے سے یو ایس پاکستان وویمن کونسل نے مس شائستہ محمود کی رہائش پر ایک تقریب کا انعقاد کیا۔ تقریب میں امریکی محکمہ خارجہ کے سینئر افسران، یو ایس پاکستان بزنس کونسل کے بورڈ ممبران، پاکستانی کمیونٹی کے ممبران اور طلبہ نے شرکت کی۔