کراچی میں شدید گرمی: پارہ 43 ڈگری تک جاپہنچا

کراچی: شہر قائد میں درجہ حرارت 43 ڈگری تک جاپہنچا ہے، سمندری ہوائیں رک گئیں جس کے باعث شہر میں گرمی کی شدت برقرار ہے۔ تفصیلات کے مطابق کراچی میں گرمی کی شدید لہر برقرار ہے دوپہر 2 بجے تک گرمی کا درجہ حرارت 43 ڈگری تک پہنچ گیا۔ محکمہ سوسمیات کے مطابق آئندہ 24 گھنٹوں کے دوران موسم شدید گرم اور گرمی کی شدت زیادہ سے زیادہ 44 ڈگری سینٹی گریڈ تک رہنے کا امکان ہے۔ محکمہ موسمیات کا کہنا ہے کہ کراچی میں ہوائیں رک گئی ہیں جبکہ بلوچستان کی گرم اور خشک ہوائیں 10 کلو میٹر فی گھنٹہ کی رفتار سے چلنے کا امکان ہے۔ شہر میں ہوا میں نمی کا تناسب 10 فیصد ہے ۔ محکمہ موسمیات کے مطابق آئندہ 24 گھنٹوںمیں ملک کے پیشتر علاقوں میں موسم گرم اور خشک رہے گا جبکہ مالاکنڈ ڈویژن اور بالائی فاٹا میں بعض مقامات پر بارش ہوسکتی ہے۔