عمرے کی ادائیگی سے واپس آنے والی فیملیاں ایئرپورٹ پر لڑ پڑیں

ماہ صیام میں عمرہ کرکے واپس آنے والے زائرین کراچی ایئرپورٹ پر آپس میں لڑ پڑے جھگڑے میں استقبال کے لیے آنے والے افراد بھی شامل ہوگئے۔جھگڑے پر قابو پانے کے لیے اے ایس ایف کو طلب کرنا پڑگیا۔
اطلاعات کے مطابق مذکورہ واقعہ منگل کی علی الصبح پیش آیا، کراچی ائیر پورٹ کے بین الاقوامی آمد کے باہر لاؤنج میں عمرہ زائرین اور ان کے استقبال کیلئے آنے والے لوگ آب زم زم کے حصول کیلئے ایک دوسرے پر مکوں اور لاتوں اور گھونسوں کی بارش کرتے رہے، جس سے کئی افراد زخمی بھی ہوئے۔
اس موقع پر مشتعل عمرہ زائرین کی رشتہ دار خواتین کی ایئر پورٹ پر چیخ و پکار مچی رہی، مشتعل افراد پر قابو پانے کے لیے انتظامیہ نے اے ایس ایف کو طلب کرلیا، سول ایوی ایشن انتظامیہ کی مداخلت کے بعد دونوں فریقین میں صلح صفائی کرادی گئی۔