شمالی وزیرستان میں گھر کی چھت گرنے سے 8 افراد جاں بحق

میران شاہ: شمالی وزیرستان کی تحصیل شوال میں گھر کی چھت گرنے سے 4 خواتین سمیت 8 افراد جاں بحق ہوگئے۔
تفصیلات کے مطابق شوال میں گھر کے کمرے کی چھت گرنے سے آٹھ افراد جاں بحق ہوگئے۔ جاں بحق ہونے والوں میں چار خواتین بھی شامل ہیں۔
مقامی افراد کے مطابق متاثرہ گھر شکور خان نامی شخص کا ہے اور جاں بحق ہونے والے تمام افراد کا تعلق ایک ہی خاندان سے ہے۔
جاں بحق افراد میں شیر خان ، ملک رانا ، نجیب اللہ ، شاہد اللہ، رحمت اللہ، گل کلامہ، نائلہ ، شاد بی بی اور دیگر شامل ہیں۔
ذرائع کے مطابق گھر کی چھت گر جانے کے بعد ریسکیو اور سیکورٹی ٹیمیں جائے حادثہ پر پہنچ گئی اور امداد کارروائی شروع کردی ۔ فرنٹیر کور کے اہلکاروں نے ملبے تلے دبی لاشیں نکالیں، جبکہ ریسکیو ٹیموں نے حادثے میں زخمی افراد کو اسپتال منتقل کردیا۔