شوال کا چاند نظر نہیں آیا ، عید الفطر بروز ہفتہ ہوگی -مفتی منیب الرحمان

کراچی:ملک بھرمیں عید کا چاند نظر نہیں آیا ہے لہٰذاکل روزہ ہو گا اور عید الفطر 16 جون بروز ہفتہ کو منائی جائے گی ۔

تفصیلات کے مطابق مفتی منیب الرحمان کی زیر صدارت رویت ہلال کمیٹی کا مرکزی اجلاس کراچی میں محکمہ موسمیات کے دفتر میں ہوا ، اجلاس میں مرکزی اور زونل رویت ہلال کمیٹی کے اراکین سمیت محکمہ موسمیات کے نمائندے بھی شریک تھے۔اجلاس میں 1439 ہجری کے شوال کے چاند کی رویت کا جائزہ لیا گیا اور شوال کے چاند سے متعلق ملک بھر سے شہادتیں جمع کی گئیں۔ملک میں بھر چاند دیکھنے کیلئے قائم زونل کمیٹیوں کی جانب سے بھی چاند نظر آنے کی کوئی شہادت موصول نہیں ہوئی ،جس کے بعد چیئرمین رویت ہلال کمیٹی مفتی منیب الرحمان نے چاند نظر نہ آنے کا اعلان کیا۔اجلاس کے بعد پریس کانفرنس کرتے ہوئے مرکزی رویت ہلال کمیٹی کے چیئرمین مفتی منیب الرحمان نے کہا کہ پاکستان کے کسی بھی حصے سے شوال المکرم کا چاند نظر آنے کی شہادت موصول نہیں ہوئی جس کے بعد متفقہ طور پر یہ فیصلہ کیا گیا ہے کہ پاکستان میں عید الفطر 16 جون بروز ہفتہ ہوگئی۔

قبل ازیں ڈائریکٹر محکمہ موسمیات کا کہنا تھا کہ شوال کے چاند کی پیدائش 13 جون کو رات 12 بجے ہوگئی ہے، اور جمعرات کی شام تک چاند کی عمر 19 گھنٹے 3منٹ ہوگی۔انہوں نے بتایا تھا کہ غروب آفتاب کے بعد 39منٹ تک چاند نظر آنے کا وقت ہے اور جمعرات کو شوال کا چاند نظر آنے کے امکانات کم ہیں۔اس حوالے سے ماہر فلکیات پروفیسر جاوید اقبال کاکہنا تھا کہ مغرب کے وقت چاند کی عمر اتنی کم ہوگی کہ عام آنکھ سے دکھائی دینا مشکل ہوگا البتہ سندھ اور بلوچستان کے ساحلی علاقوں میں چاند دور بین سے دکھائی دیا جاسکتا ہے۔

دوسری جانب سعودی عرب میں شوال کا چاند نظر آ گیاہے جس کے بعد مملکت میں کل عید الفطر مذہبی جوش و جذبے کے ساتھ منائی جائے گی ۔ عرب ٹی وی کا کہناہے کہ سعودی عرب اور متحدہ عرب امارات میں عید کا چاند نظر آ گیاہے کل دونوں ریاستوں میں عید منائی جائے گی ۔عرب ٹی وی کا کہناہے کہ شوال کا چاند سب سے پہلے جبل حفیت اور العین کے مقام پر دیکھا گیاہے ۔

سعودی عرب کے علاوہ انڈونیشیا ، ملائشیا اور برونائی میں بھی شوال کا چاند نظر آ گیاہے جبکہ سری لنکا اور بھارت میں عید پاکستان کے ساتھ ہی ہفتہ کے روز منائی جائے گی ۔میڈیا رپورٹس کے مطابق متحدہ عرب امارات کے مرکز فلکیات نے جدید ٹیکنالوجی کی مدد سے دوپہر میں ہی چاند دیکھ لیا ہے تاہم چاند کی رویت کا باضابطہ اعلان مرکزی ہلال کمیٹی کرے گی، بھارتی میڈیا نے کہا ہے کہ بھارت میں شوال کا چاند نظرنہیں آیا ہے اور وہاں بھی عید ہفتہ 16 جون کو ہوگی۔جبکہ ترکی میں شوال کا چاند نظر آگیا ہے اور وہاں جمعے کو عید الفطر منائی جائے گی، ترکی میں اس سال 30 روزوں کے بعد عیدالفطر منائی جائےگی۔اس کے علاوہ جاپان کی رویت ہلال کمیٹی نے بھی جمعے کو عیدالفطر منانے کااعلان کردیا ہے۔