ٹینکر مافیاسے کراچی کے عوام کی جان چھڑائیں گے،چیف جسٹس

کراچی:سپریم کورٹ کراچی رجسٹری میں چیف جسٹس پاکستان کی سربراہی میں سندھ میں فراہمی و نکاسی آب کیس کی سماعت ہوئی۔اس موقع پر پیش کی گئی سندھ واٹر کمیشن کی رپورٹ پر عدالت نے کمیشن کی کارکردگی کو قابل ستائش قرار دیتے ہوئے رپورٹ پر اطمینان کا اظہار کیا اور کمیشن کو ماہانہ کارکردگی رپورٹس پیش کرنےکا بھی حکم دیا۔
جسٹس ثاقب نثار نے ریمارکس دیتےہوئے کہاکہ ٹینکرز مافیا سے کراچی کے عوام کی جان چھڑائیں گے، کراچی کے شہریوں کو ہر حال میں صاف پانی دینا ہے۔
اس موقع پر سیکریٹری آب نے عدالت کو بتایا کہ منچھر جھیل سے یومیہ 300 ملین کیوسک پانی ملتا ہے، چیف جسٹس نےمنچھر جھیل کی صفائی نہ ہونے اور گندے پانے کے اخراج پر عدالت نے برہمی کا اظہار کیا۔
چیف جسٹس نے سیکریٹری آب سے کہا کہ آپ نے 14.5 ارب روپے میں سے ایک روپیہ بھی خرچ نہیں کیا، سمندر کا جو حال دیکھا ہے وہ افسوسناک ہے، بوتلوں اور غلاظت کا ڈھیر ہے، روزانہ 450 ملین گیلن سیورج سمندر میں جارہا ہے، 10 سال سے حکومت نے کیا کام کیا؟ اب سپریم کورٹ خود مانیٹر کرے گی۔