مدر اینڈ چائلڈ اسپتال کو 18 ماہ میں مکمل کرنے کا عدالتی حکم

اسلام آباد: سپریم کورٹ نے 10 سال سے تاخیر کا شکار مدر چائلڈ اسپتال کو 18 ماہ میں مکمل کرنے کا حکم دے دیا۔
چیف جسٹس آف پاکستان میاں ثاقب نثار کی سربراہی میں سپریم کورٹ کے بنچ نے راولپنڈی میں مدر اینڈ چائلڈ اسپتال کی عدم تعمیر سے متعلق کیس کی سماعت کی۔ حکومت نے اسپتال کی تعمیر مکمل کرنے کے لئے 2 سال کی مہلت مانگی تاہم سپریم کورٹ نے درخواست مسترد کردی۔
چیف جسٹس نے اسپتال کو 18 ماہ میں مکمل اور فعال کرنے کا حکم دیتے ہوئے کہا کہ متعلقہ حکام روزانہ کام کرکے پیشرفت رپورٹ دیں، اسپتال کی تعمیر میں پہلے ہی 10 سال تاخیر ہوچکی۔ عدالت نے ہاتھ ہلکا رکھا تو 2 سال میں بھی تعمیر مکمل نہیں ہوگی۔
چیف جسٹس نے اسپتال کی تعمیر سے متعلق ٹائم لائن تیار کرنے کی ہدایت کرتے ہوئے کہا کہ متعلقہ حکام آج ہی میٹنگ کرکے منصوبہ بندی سے آگاہ کریں۔
اسٹاف کے لئے گھر بن گئے لیکن اسپتال مکمل نہیں ہوا، تعمیر میں تاخیر کا ذمہ دارکون ہے۔ سماعت کے بعد چیف جسٹس نے زیر تعمیر اسپتال کا دورہ بھی کیا اور کاموں کا جائزہ لیا۔ اس موقع پر چیف جسٹس نے پبلک ورکس ڈیپارٹمنٹ (پی ڈبلیو ڈی) کے چیف انجینئر کی سرزنش بھی کی۔