ایم کیو ایم اور جی ڈی اے کا الیکشن میں ایک دوسرے سے تعاون پر اتفاق

کراچی: ایم کیو ایم پاکستان اورگرینڈ ڈیموکریٹک الائنس (جی ڈی اے)نے عام انتخابات میں ایک دوسرے کے ساتھ تعاون کرنے پر اتفاق کرتے ہوئے فیصلہ کیا کہ سندھ میں پیپلز پارٹی کے خلاف جہاں ضرورت پڑی ایک دوسرے کی حمایت کریں گے۔
پیر صدر الدین شاہ راشدی (یونس سائیں) کی سربراہی میں وفد نے ایم کیو ایم کے سربراہ ڈاکٹر خالد مقبول صدیقی سے ملاقات کی۔ جی ڈی اے کے وفد میں سردار عبدالرحیم اور نند کمار بھی شامل تھے جب کہ متحدہ قومی موومنٹ کی جانب سے سینئر ڈپٹی کنوینر عامر خان، فیصل سبزواری اور اسلم بھٹو نے بھی ملاقات میں شرکت کی۔ دونوں جماعتوں نے ملکی سیاسی صورتحال ، عام انتخابات اور سیاسی تعاون پر گفتگو کی۔
ملاقات کے دوران سندھ کی مختلف قومی و صوبائی اسمبلی کی نشستوں پر ایک دوسرے سے تعاون کیا جائے گا۔
خالد مقبول نے کہا کہ سندھ کے عوام کو پی پی کی کرپٹ اور نااہل لیڈروں اور حکومت سے بچانا ہے۔ سردار رحیم کا کہنا تھا کہ دیگر سیاسی جماعتوں کے لیے بھی تعاون کے دروازے کھلے ہیں۔