عسکری پارک میں جھولاگرنےسے جاں بحق لڑکی سپردخاک

کراچی: پرانی سبزی کے علاقے میں واقع عسکری پارک کی انتظامیہ کی غفلت سے جھولا گرنے کے واقعے میں جان سے جانے والی 14 سالہ لڑکی کشف کی نمازجنازہ شرف آباد کی مسجد میں ادا کردی گئی اور اسے عیسیٰ نگری قبرستان میں سپردخاک کردیا گیا ہے۔

کشف 6 بہن بھائیوں میں سے بڑی اورماں باپ کی لاڈلی تھی ۔ اس نے3 دن قبل ہی اپنی سالگرہ منائی تھی ۔

کشف کے اسکول کی چھٹیاں تھیں اوروہ تفریح کے لئے دادا، دادی اور بہن بھائیوں کے ساتھ عسکری امیوزمنٹ پارک گئی تھی۔

غم سے نڈھال کشف کی والدہ باربارایک ہی التجا کرتی رہیں کہ ایسے پارکس بند کردیئے جائیں جہاں انسانی زندگی سے زیادہ پیسے کی اہمیت ہو۔

معصوم کشف اکیلی فرزبی پینڈولم جھولے میں بیٹھی تھی جو 360 ڈگری پرزمین سے40 فٹ اوپرکچھ یوں گھومتا ہے کہ لوگ تھرل محسوس کرتے ہیں۔

عینی شاہدین کے مطابق ابھی جھولا گھومنا شروع ہی ہوا تھا کہ زوردار آواز کے ساتھ زمین پر آگرا۔

کشف کے والد کاروباری کام کے سلسلے میں چین میں تھے جہاں انہیں یہ افسوسناک خبرملی۔

والدین کا کہنا ہےکہ کشف بہت خوش تھی، جب تک وہ حیات تھی ان کے مسکرانے کی وجہ رہی۔