آصف زرداری اورفریال تالپور کا نام ای سی ایل سے نکال دیا گیا

اسلام آباد: وزارت داخلہ نے آصف زرداری اور فریال تالپور کا نام ای سی ایل سے نکال دیا ہے۔
وفاقی تحقیقاتی ادارے (ایف آئی اے) نے منی لانڈرنگ کے کیس میں آصف زرداری اور فریال تالپور کا نام ایگزٹ کنٹرول لسٹ (ای سی ایل) میں ڈالا تھا اور اس ضمن میں انہیں پوچھ گچھ کے لئے طلب بھی کیا گیا تھا تاہم دونوں شخصیات کے وکلا ایف آئی اے میں پیش ہوئے تھے۔
اطلاعات کے مطابق وزارت داخلہ نے بے نامی اکاؤنٹس اورمنی لانڈرنگ کیس کے سلسلے میں آصف زرداری اورفریال تالپورکا نام ایگزٹ کنٹرول لسٹ سےنکال دیا ۔
ذرائع کا کہنا ہےکہ سیکریٹری داخلہ کے حکم پر چند روز قبل سمری تیار ہوئی تھی جس کی روشنی میں آج دونوں شخصیات کے نام ای سی ایل سے نکالے گئے ہیں۔
ذرائع نے بتایا کہ چیف جسٹس پاکستان کے ریمارکس کی روشنی میں دونوں شخصیات کا نام ای سی ایل سے نکالنے کا فیصلہ کیا گیا۔
گزشتہ دنوں سپریم کورٹ میں منی لانڈرنگ کیس کی سماعت کے موقع پرعدالت نے سابق صدرآصف زرداری اورفریال تالپور کو طلب کیا تھا۔

اس موقع پر چیف جسٹس نے ریمارکس دیئے تھے کہ عدالت نے آصف زرداری اور فریال تالپورکا نام ای سی ایل میں ڈالنے کیلئے نہیں کہا تھا اورساتھ ہی عدالت نے ایف آئی اے کو الیکشن تک دونوں شخصیات کو نہ بلانے کی ہدایت کی تھی۔