3 کم عمر پاکستانی لڑکیوں نے منگلیسر چوٹی سرکرکے ریکارڈ قائم کردیا

پیر 30 جولائی 2018, 3:37 صبح آخری اپ ڈیٹ پیر 30 جولائی 2018, 7:24 صبح چشم حیرت

اسکردو: پاکستان کی 3 لڑکیوں نے شمشال ویلی میں قراقرم پہاڑی سلسلے کی 6 ہزار 80 میڑ طویل ’منگلیسر‘ چوٹی سر کرکے تاریخی ریکارڈ قائم کردیا۔
چوٹی سر کرنے والوں میں آمنہ حنیف (13 سال)، مریم بشیر (14 سال) اور سعدیہ بتول (15 سال) شامل ہیں اور تینوں گلگت بلتستان ویلی کی رہائشی ہیں۔

تینوں لڑکیاں معروف کوہ پیما سدپارہ لیٹل کریم کی نواسی اور پوتیاں ہیں۔تینوں نو عمر لڑکیوں نے اپنے دادا لیٹل کریم، محمد حنیف اور دیگر چار غیر ملکی کوہ پیما کے ہمراہ سفر کا آغاز کیا اور 24 جولائی کو چوٹی سر کی۔
کامیاب کوہ پیمائی کے حوالے سے تینوں نے ڈان سے بات چیت میں اپنے دادا کا شکریہ کیا اور کہا کہ ’اگر ہمارے دادا ہمیں حوصلہ نہیں دیتے تو ہم اس تاریخی کارنامے کو سر انجام نہیں دے سکتی تھیں اور اب ہم دنیا کے کوہ پیماؤں میں سے سب سے زیادہ کم عمر ہیں‘۔
آمنہ نے کہا کہ ’یہ کوہ پیمائی کا آغاز ہے اور مستقبل میں دنیا کی خطرناک ترین چوٹیاں سر کرنے کا پختہ ارادہ ہے‘۔

آمنہ اور مریم کے والد محمد حنیف نے بتایا کہ انہوں نے اپنا سفر 16 جولائی کو شروع کیا اور انتہائی جدوجہد اور محنت کے بعد ان کی بیٹیوں نے 24 جولائی کو کامیابی سے چوٹی سر کی۔ انہوں نے ہسپانوی کوہ پیماہ ماریہ مارکو کا شکریہ ادا کیا جن کی بدولت اور رہنمائی کے باعث لڑکیوں نے کامیابی سے چوٹی سر کی۔
دوسری جانب لیٹل کریم نے اپنی پوتی اور نواسیوں کی کامیابی پر تسلی اور خوشی کا اظہار کیا اور کہا کہ مذکورہ کوہ پیمائی کا مقصد گلگت بلتستان میں خواتین کو کوہ پیمائی کے لیے حوصلہ دینا ہے۔