اسلام آباد کے پارک میں لڑکی سے مبینہ اجتماعی زیادتی،4 ملزمان گرفتار

اسلام آباد: وفاقی دارالحکومت کے ایف نائن پارک میں سیکورٹی پر تعینات کیپیٹل ڈیولپمنٹ اتھارٹی (سی ڈی اے) ملازمین اور گارڈ نے ایک لڑکی کو مبینہ طور پر اجتماعی زیادتی کا نشانہ بنایا۔
تفصیلات کے مطابق اسلام آباد کے ایف نائن پارک میں کیپیٹل ڈیولپمنٹ اتھارٹی (سی ڈی اے) ملازمین اور گارڈ نے ایک لڑکی کو اپنی ہوس کا نشانہ بنایا۔
تھانہ مارگلہ پولیس کے مطابق متاثرہ لڑکی کی جانب سے درخواست دی گئی کہ ایف نائن پارک ملازمین نے اسے ایک لڑکے کے ساتھ دیکھ کر غیر اخلاقی حرکت کا الزام لگایا اور ڈرانے کی کوشش کی۔ سی ڈی اے ملازم نے دھمکی دی کہ پارک میں آنے والے لڑکیوں اور لڑکوں کو پولیس کے حوالے کیا جاتا ہے، اگر ہماری بات نہ مانی تو پولیس کے حوالے کردیں گے۔
لڑکی کے مطابق ملازمین نے 2 ہزار روپے رشوت لے کر جنگل کے راستے باہر جانے کا کہا۔ جہاں پارک ملازم نے گارڈ اور دیگر ملازمین کے سامنے اسے ہوس کا نشانہ بنایا اور جان سے مارنے کی دھمکیاں بھی دیں۔
متاثرہ لڑکی کی درخواست پر پولیس نے مقدمہ درج کرکے چاروں ملزمان کو گرفتار کرلیا ہے۔