چیف جسٹس نے چوہدری نثار سےمتعلق بیان کی وضاحت کردی

خیال رہے کہ گزشتہ روز چیف جسٹس میاں ثاقب نثار کی جانب سے یہ ریمارکس دیئے گئے تھے کہ پاناما جے آئی ٹی میں انٹرسروسزانٹیلی جنس (آئی ایس آئی) اور ملٹری انٹیلی جنس (ایم آئی) کے اہلکاروں کو چوہدری نثار نے شامل کرایا تھا۔

چیف جسٹس نے ریمارکس دیے تھے کہ سابق وزیراعظم نواز شریف کے خلاف منی لانڈرنگ کی تحقیقات کرنے والی جے آئی ٹی میں خفیہ اداروں کے نمائندوں کو انہوں نے شامل نہیں کیا تھا۔

تاہم اس معاملے پرجمعرات کو ایک کیس کی سماعت کے دوران چیف جسٹس نے وضاحت دیتے ہوئے کہا کہ پاناما جے آئی ٹی سپریم کورٹ نے ہی بنائی تھی، ان کے کہنے کا مقصد ڈان لیکس جے آئی ٹی تھا،ان سے غلطی ہوگئی تھی۔

چیف جسٹس نے کہا کہ یہ تصیح کی جائے، لگتا ہے کسی کو مجھ سے زیادہ محبت ہے، ایک انگریزی اخبارنے کیا چھاپا ہے، کہاں ہے اس اخبار کا رپورٹر؟

اس پر سپریم کورٹ میں موجود رپورٹر نے عدالت کے سامنے کہا کہ وہ اس عمل پر معافی مانگتا ہے جس پر چیف جسٹس نے ریمارکس دیے کہ اس معاملے پر ٹاک شوز بھی ہوگئے، تھپڑ لگا کر معافی مانگنے کا کیا فائدہ ، آپ کے اخبار کے مالک کل لاہور عدالت میں پیش ہوں۔

اس دوران اس اخبار کے رپورٹر نے عدالت سے معافی کی استدعا کی، جس کے بعد عدالت نے رپورٹر کی معذرت پر معاملہ نمٹا دیا۔