پی ٹی آئی سے خواتین کی 3 نشستوں کیلئے نام طلب

اسلام آباد: الیکشن کمیشن آف پاکستان نے تحریک انصاف سے خواتین کی 3 نشستوں کیلیے نام مانگ لیے۔
اس حوالے سے الیکشن کمیشن نے شیڈول بھی جاری کردیا ہے اور صوبائی الیکشن کمشنر خیبرپختون خوا کو ریٹرننگ افسر مقرر کردیا گیا ہے۔
الیکشن کمیشن کےمطابق تحریک انصاف کی خواتین کی ترجیحی فہرست میں نام ختم ہوگئے ہیں جس کے باعث تحریک انصاف سے قومی اسمبلی کی ایک اور خیبرپختون خوا اسمبلی کی 2 مخصوص نشستوں پر امیدواروں کے نام مانگے گئے ہیں۔
شیڈول کے مطابق تینوں خالی مخصوص نشستوں پر صرف تحریک انصاف کے امیدوار کاغذات نامزدگی جمع کرا سکتے ہیں، کاغذات نامزدگی 28 سے 30 اگست تک جمع ہوں گے اور ان کی چھان بین 4 ستمبر تک ہوگی، اپیلیں 8 ستمبر تک دائر کرائی جاسکیں گی جب کہ اپیلوں پر فیصلے 13 ستمبر تک ہوں گے اور اہل امیدواروں کی فہرست 16 ستمبر کو جاری ہوگی۔