صدارتی انتخاب،آصف زرداری کی پارٹی رہنماؤں کودیگر جماعتوں سے رابطوں کی ہدایت

اسلام آباد: پیپلز پارٹی کے شریک چیئرمین آصف علی زرداری کی زیرصدارت پیپلز پارٹی کا اہم اجلاس ہوا جس میں صدارتی انتخاب اور سیاسی صورتحال پر مشاورت کی گئی۔اجلاس میں آصف زرداری نے پارٹی رہنماؤں کو اپنے صدارتی امیدوار کو ووٹ دینے کے لیے تحریک انصاف سمیت تمام پارلیمانی جماعتوں سے رابطے کی ہدایت کی ہے۔
زرداری ہاؤس اسلام آباد میں آصف زرداری کی زیرصدارت پیپلز پارٹی کا اہم اجلاس ہوا۔
آصف زرداری نے اجلاس کے دوران کہا کہ اعتزاز احسن ہی پیپلز پارٹی کے صدارتی امیدوار ہیں اس لیے ان کے لیے تحریک انصاف سمیت تمام پارلیمانی جماعتوں سے رابطہ کیا جائے۔
اس موقع پر آصف زرداری نے مولانا فضل الرحمان کے صدارتی امیدوار بننے پر تشویش کا اظہار کیا جب کہ اجلاس میں شریک رہنماؤں نے مؤقف اختیار کیا کہ مولانا فضل الرحمان تو پیپلز پارٹی کے مؤقف کے حامی اور وکیل تھے، وہ خود کس طرح امیدوار بن گئے۔
یاد رہے کہ 4 ستمبر کو ہونے والے صدارتی انتخاب کے لیے اپوزیشن اتحاد مشترکہ صدارتی امیدوار لانے میں ناکام ہوگیا اور پیپلز پارٹی کی جانب سے اعتزاز احسن کے نام پر ڈٹے رہنے کے بعد دیگر حزب اختلاف کی جماعتوں نے مولانا فضل الرحمان کو نامزد کردیا۔