چیف جسٹس کانجی اسپتال کاخفیہ دورہ ، شرجیل میمن کےکمرےسےشراب ومنشیات برآمد

 کراچی: چیف جسٹس پاکستان میاں ثاقب نثارکاکراچی کی نجی اسپتال میں زیرعلاج پاکستان پیپلز پارٹی  کے رہنما شرجیل انعام میمن کے کمرے کا خفیہ دورہ کیا،جس کے دوران وہاں شرجیل میمن کے کمرے سے شراب کی بوتلیں، منشیات اور سگریٹ کے پیکٹ ملے ہیں۔

چیف جسٹس پاکستان جسٹس میاں ثاقب نثار نے کراچی کے 3 اسپتالوں کا دورہ کیا،

سب سے پہلے وہ کلفٹن کراچی میں نجی اسپتال میں زیر علاج پی پی رہنما شرجیل میمن کے کمرے میں پہنچے،انہوں نے شرجیل میمن سے انتہائی مختصر ملاقات کی۔

عینی شاہدین کے مطابق چیف جسٹس شرجیل انعام میمن کے کمرے میں 3 منٹ تک رہے اور پیپلز پارٹی رہنما کے علاج اور بیماری کے حوالے سے سوالات کیے۔

شرجیل انعام میمن کے کمرے میں علاج نام کی کوئی چیز نہیں تھی۔ اس موقع پر وہاں انہیں شراب کی بوتلیں، سگریٹ کے پیکٹ اور دیگر منشیات ملیں جن کی انہوں نے خود تصاویر اتاریں۔

اس کے بعد چیف جسٹس ثاقب نثار خفیہ طور پر کراچی کے جناح اسپتال کے شعبہ کارڈیو ویسکولر پہنچے،جہاں آصف زرداری کے فرنٹ مین انور مجید کے کمرے اور ان کے علاج اور بیماریوں کا جائزہ لیا اور کچھ ریکارڈ بھی قبضے میں لیاجس کے بعد چیف جسٹس ثاقب نثارانور مجید کے بیٹے غنی مجید کے وارڈ کا بھی معائنہ کیا۔

تاہم غنی مجید کے کمرے میں موجود نہ ہونے پر استفسار کیا تو چیف جسٹس کو بتایا گیا کہ ملزم کو ایم آر آئی کرانے کے لیے لے جایا گیا ہے۔

اس کے بعد چیف جسٹس آف پاکستان نے وہاں موجود مختلف لوگوں سے بات چیت بھی کی۔

اس موقع پر ڈاکٹر سیمی جمالی بھی جسٹس ثاقب نثار کے ہمراہ تھیں۔