جعلی بینک اکائونٹ کیس:سپریم کورٹ نے جے آئی ٹی تشکیل دے دی

اسلام آباد: جعلی بینک اکاؤنٹ کیس سے متعلق تحقیقات کرنےکیلئے سپریم کورٹ آف پاکستان نے6 رکنی جے آئی ٹی تشکیل دے دی۔
تفصیلات کے مطابق جعلی بینک اکاؤنٹ کیس کی مزید تحقیقات کے لیے سپریم کورٹ کی جانب سے مشترکہ تحقیقاتی ٹیم تشکیل دے دی ہے جو مختلف اداروں کے چھ نمائندگان پر مشتمل ہے۔
سپریم کورٹ کی طرف سے جاری کردہ فیصلے میں کہا گیا ہے کہ جےآئی ٹی اپنی آسانی کے مطابق سیکریٹریٹ قائم کرے، ٹیم کو کریمنل پروسیجر، نیب آرڈیننس، ایف آئی اے ایکٹ اور اینٹی کرپشن قوانین کے تحت اختیارت حاصل ہوں گے۔
جے آئی ٹی ممبران میں ایف آئی اے کے احسن صادق، ریجنل ٹیکس آفس کے کمشنر آئی آرعمران لطیف، اسٹیٹ بینک کے جوائنٹ ڈائریکٹر بی آئی ڈی ون ماجد حسین شامل ہیں۔
مشترکہ تحقیقاتی ٹیم میں نیب کے ڈائریکٹر نعمان اسلم، سیکورٹی ایکس چینج کمیشن کے ڈائریکٹر محمد افضل اور آئی ایس آئی کے بریگیڈیئر شاہد پرویز کو بھی شامل کیا گیا ہے۔