سعودی عرب کاپاکستان کو مالی بحران سےنمٹنےکیلئے12ارب ڈالرکاپیکیج دینےکافیصلہ

اسلام آباد:وزیراعظم پاکستان عمران خان دو روزہ دورے پر سعودی عرب میں موجودہیںجبکہ سعودی عرب نے پاکستان کو مالی بحران سے نمٹنے کیلئے12 ارب ڈالر کا پیکیج دینے کا فیصلہ کیا ہے جس میں 3ارب ڈالر کی رقم اور9 ارب ڈالر کا ادھار تیل دینے کا فیصلہ کیا ہے۔
اطلاعات کے مطابق وزیراعظم ہائوس سے جاری اعلامیے میں کہا گیا ہے کہ سعودی عرب پاکستان کو 9 ارب ڈالرکا تیل ادھار دینے کیلئے رضامند ہوگیا ہے، ادھار تیل کی سہولت 3 سال کے لیے ہوگی اور 3 سال بعد ادھار تیل کی سہولت میں توسیع ہوسکے گی جب کہ سعودی عرب تین ارب ڈالرز پاکستان کے پاس ایک سال کے لیے بیلنس آف پے منٹ کے طور ڈیپازٹ بھی رکھے گا، اس کے علاوہ سعودی عرب پاکستان میں آئل ریفائنری منصوبہ لگانے پر بھی رضا مند ہوگیا ہے اور پاک سعودی معاہدے سے متعلق سعودی وفد جلد پاکستان کا دورہ کرے گا۔اعلامیے میں کہا گیا ہے کہ ولی عہد محمد بن سلمان پاکستانی ورکرز کے لیے ویزا فیس کم کرنے پر بھی متفق ہوگئے ہیں،اعلامیے میں مزید کہا گیا کہ بلوچستان میں معدنیات کی تلاش کیلیے سعودی عرب کا دلچسپی کا اظہار ہے اور اس سلسلے میں وفاقی اور بلوچستان حکومت معدنیات کی تلاش کے معاملات طے کریں گے۔