خیبرپختونخوا اسمبلی میں صوبائی احتساب کمیشن کے خاتمے کا بل منظور

پشاور: خیبرپختونخوا اسمبلی نے صوبائی احتساب کمیشن کوختم کرنے کی منظوری دے دی۔
تفصیلات کے مطابق خیبر پختونخواہ اسمبلی کے آج ہونے والے اجلاس میں صوبائی وزیر قانون سلطان محمد کی جانب سے احتساب کمیشن کے خاتمے کا پیش کیا گیا۔
صوبائی اسمبلی نے احتساب کمیشن کے خاتمے کا بل کثرت ِ رائے سے منظور کرتے ہوئے اس کے تمام اثاثے اینٹی کرپشن کے حوالے کرنے کافیصلہ کیا ہے۔
بل کے مطابق احتساب کمیشن کے کنٹریکٹ ملازمین کی نوکریاں ختم ہوجائیں گی اور مستقل ملازمین کوسرپلس پول میں رکھاجائےگا۔ مستقل ملازمین کو گولڈن ہینڈ شیک دینے کی تجویز پر بھی غور کیا جارہا ہے۔
یاد رہے کہ قوانین کے مطابق احتساب کمیشن پانچ کروڑ سے زائد کی کرپشن پر ہی کارروائی کرسکتا تھا ، اس سے کم پر کارروائی کا دائر اختیار اینٹی کرپشن کا تھا۔ اب احتساب کمیشن کو ختم کرنے سے اینٹی کرپشن کا دائرہ اختیار بڑھانا ہوگا تاکہ وہ پانچ کروڑ سے زائد کی کرپشن کے خلاف بھی کارروائی کرسکے۔
خیبر پختونخواہ کے محکمہ اینٹی کرپشن کی استعداد بڑھانے کے لیے احتساب کمیشن کے تمام تر اثاثے بھی بل کے ذریعے اینٹی کرپشن کے حوالے کیےجارہے ہیں۔