عمران خان اور بلاول زرداری میں ٹوئٹر ملاکھڑا

وزیراعظم عمران خان نے کہا ہے کہ ہمارے کچھ ارکان پارلیمنٹ ای سی ایل سے اتنے خوفزدہ کیوں ہے اور بیرون ملک جانے کے لئے اتنے بے چین کیوں ہیں۔

وزیر اعظم نے ٹوئیٹر پر کہا کہ سیاستدانوں کو تو ابھی ملک کے لئے بہت کچھ کرنا ہے، ملک سے محبت کے دعویدار بیرونی دوروں کے لئے انتظار تک نہیں کر سکتے۔ 

انہوں نے کہا کہ کئی ارکان اسمبلی کے پاس تو بیرون ملک رہائش اور اقامہ بھی ہے۔

وزیر اعظم نے مزید کہا کہ کیا کوئی ہماری اس عجیب و غریب حقیقت کی وضاحت کرسکتا ہے کہ ہم پاکستان میں خوش ہیں اور اس ملک کے لئے کام کرنا چاہتے ہیں کیوں کہ ہم پاکستان سے محبت کرتے ہیں۔

دوسری جانب پیپلز پارٹی کے چئیرمین بلاول بھٹو زرداری نے وزیراعظم عمران خان کے ٹوئیٹ کا ردعمل دیتے ہوئے کہا کہ ظاہر ہے سلیکٹڈ وزیراعظم انسانی حقوق، نقل وحرکت کی آزادی کا تصور نہیں سمجھتے۔

ان کا کہنا تھا کہ یہ دیکھ کر ہنسی آتی ہے کہ ای سی ایل پر صرف اپوزیشن اراکین کےنام ہیں، حکومتی اراکین بشمول وزیراعظم بیرون ملک دورے کررہے ہیں۔

بلاول بھٹو نے مزید کہا کہ وزیراعظم نے تو پہلے 6 ماہ میں بیرون ملک دورہ نہ کرنے کا وعدہ کیا تھا، لیکن اب تک 7 دورے کر چکے ہیں۔