کراچی سمیت ملک کے اکثر شہروں میں موسم سرداورخشک رہےگا،محکمہ موسمیات

کراچی : محکمہ موسمیات نے کراچی سمیت ملک بھر کے اکثر شہروں میں موسم سرد اور خشک رہنے کی پیشگوئی کی ہے جبکہ آزاد کشمیر اور گلگت بلتستان میں بارش کا بھی امکان ظاہر کیاہے۔
کوئٹہ سمیت بلوچستان میں موسم شدید سرد ہے، زیارت میں برفیلی ہوائوں نے شہریوں کی قلفی جمادی ۔ دوسری جانب کراچی میں دھوپ چھاؤں کا کھیل بھی جاری ہے، سنہری دھوپ میں شہر کا حسن نکھر آیا۔
لوئر دیر میں برفباری اور بارش کے بعد بادلوں سے جھانکتی ہوئی سورج کی کرنیں اور ٹھنڈی ہوائیں موسم کو مزید سہانا اور دلکش بنا رہی ہیں جبکہ اسکردو میں برفباری نے خوبصورت نظارے سجادیئے، سڑکیں برف کے نیچے چُھپ گئیں۔
اس کے علاوہ لاہور سمیت پنجاب کے مختلف شہروں میں دھند کا راج رہا جس کے باعث شاہراہوں پر ٹریفک کی روانی متاثر ہوئی، تاہم کسی حادثے یا ناخوشگوار واقعے کی اطلاع موصول نہیں ہوئی۔