سندھ کے سرکاری ڈاکٹرزکی تنخواہیں پنجاب کے برابر کرنے کی منظوری

سندھ کابینہ نے سرکاری ڈاکٹروں کی تنخواہیں پنجاب کے ڈاکٹروں کے برابر کرنے کی منظوری دے دی ہے۔

تفصیلات کے مطابق وزیراعلیٰ سندھ مراد علی شاہ کی زیرصدارت صوبائی کابینہ کا اجلاس ہوا ۔
اجلاس میں سندھ کابینہ نے سرکاری ڈاکٹروں کے لیے نیا سیلری پیکج پنجاب کے برابر کرنے کی منظوری دیدی ہے، کابینہ کے فیصلے کے مطابق اب قانون سازی ہوگی جس گے تحت سیلری کا اضافہ صحت، تعلیم اور دیگر اداروں میں کارکردگی کی بنیاد پر ہوگا جب کہ وزیراعلیٰ سندھ مراد علی شاہ نے مزید ڈاکٹروں کو مقرر کرنے کی بھی ہدایت کردی ہے۔

ترجمان وزیراعلیٰ سندھ کے مطابق نئے ڈاکٹروں کی نئی بھرتی مخصوص اسپتالوں میں ہوگی اور وہاں سے ٹرانسفر نہیں ہوسکے گا، نئی سیلری کا اطلاق فروری سے ہوگا جب کہ 15 ہزار فی ماہ تمام ہاؤس افسران کو اضافی دیا جائے گا اور محکمہ صحت تمام ڈاکٹروں کے سیلری اسٹرکچر پر نظر ثانی کرے گا۔

کابینہ کو بریفنگ میں بتایا گیا کہ ان تمام الاؤنسز اور تنخواہوں کے جائزے کے بعد 5.6 بلین روپے سالانہ خزانے پر بوجھ ہوگا، کابینہ کے بیشتر ممبران نے ڈاکٹروں کی تنخواہ بڑھانے کو پرفارمنس یا اچھی کارکردگی سے منسوب کرنے کی تجویز دی ہے۔