بھارتی ونگ کمانڈر لینڈنگ کے فوراً بعد
بھارتی ونگ کمانڈر لینڈنگ کے فوراً بعد

گرفتار بھارتی پائلٹ کوپاک فوج نے لوگوں کے غیض و غضب سے بچایا

بدھ 27 فروری 2019, 3:44 شام       آخری اپ ڈیٹ بدھ 27 فروری 2019, 6:13 شام امت خاص, اہم خبریں, قومی

آزاد کشمیر میں بھارتی طیاروں کی تباہی کے بعد گرفتار ہونے والے ایک بھارتی پائلٹ کو پاکستانی افواج نے مقامی لوگوں کے غیض و غضب سے بچایا اور بحفاظت ساتھ لے کر گئے۔ بھارتی پائلٹ نے پاک فوج کے رویے کی تعریف کی ہے۔

بھارتی ونگ کمانڈر ابھی نندن کا طیارہ آزاد کشمیر میں داخل ہونے کے بعد پاک فضائیہ نے مار گرایا تھا۔ طیارے کے گرنے کے بعد بھارتی پائلٹ پیراشوٹ کے ذریعے اترا تو مقامی لوگوں اور علاقے میں تعینات فوجیوں نے اسے پکڑ لیا۔

سوشل میڈیا پر اس حوالے سے تین ویڈیوز موجود ہیں۔ پہلی ویڈیو میں دیکھا جا سکتا ہے کہ بھارتی ونگ کمانڈر ایک ندی میں ہے، مقامی لوگوں نے اسے پکڑ رکھا ہے اور اسے تھپڑ اور ٹھڈے مار رہے ہیں۔ ایک پاکستانی فوجی اسے بچانے کی کوشش کر رہا ہے۔ ایک اور فوجی کی آواز آتی ہے، ’نہیں مارنا بس بس‘‘ ایک ہوائی فائر بھی ہوتا ہے۔

اس پہلی ویڈیو میں بھارتی پائلٹ کا چہرہ صاف ہے جبکہ کچھ دیر بعد سامنے آنی والی دیگر ویڈیوز میں اس کے چہرے پر خون دکھائی دے رہا ہے۔

مقامی ذرائع ہے کہنا ہے کہ علاقے میں بھارتی فوج کی جانب سے ہونے والی مسلسل شیلنگ بالخصوص منگل کی شام کی گئی گولہ باری پر مقامی عوام سخت مشتعل ہیں۔

سوشل میڈیا پر سامنے آنے والی دوسری فوٹیج میں دکھا جا سکتا ہے کہ پاکستانی فوجی بھارتی پائلٹ کو حصار میں لے کر جا رہے ہیں۔ اس موقع پر ویڈیو میں نظر نہ آنے والا کوئی شخص غالباً پائلٹ کو ایک بار پھر مارنے کی کوشش کر تا ہے جس پر اسے منع کیا جاتا ہے۔

پاکستانی فوجی بھارتی پائلٹ کو ایک ڈبل کیب گاڑی تک لے جاتے ہیں جہاں اسے گاڑی  میں بٹھایا جاتا ہے اور مقامی لوگوں کو جانے کے لیے کہا جاتا ہے۔

اس پوری ویڈیو میں جوشیلے شہری پاک فوج زندہ باد کے نعرے لگاتے دکھائی دے رہے ہیں۔

اگرچہ پاک فوج نے اپنی ذمہ داری نبھانے میں کوئی غفلت نہیں برتی تاہم ایک روز پہلے تک جنگی جنون بڑھانے والے بھارتی صحافیوں کو اب جنیوا کنونشن یاد آگیا ہے اور وہ مطالبہ کر رہے ہیں کہ گرفتار پائلٹ سے جنیوا کنونشن کے تحت سلوک کیا جائے اور اس کی ویڈیوز یا تصاویر سامنے نہ لائی جائیں۔

 

 

یاد رہے کہ پاک فوج نے بھارتی پائلٹ گرفتاری کے مناظر کی باضابطہ طور پر کوئی ویڈیو یاتصویر جاری نہیں کی اس حوالے سے ویڈیوز سوشل میڈیا اکائونٹس سے سامنے آئیں۔ تاہم پاک فوج کے ترجمان میجر جنرل آصف غفور نے ایک تصویر کئی گھنٹے بعد جاری کی۔ جبکہ غیر سرکاری ٹوئٹر اکائونٹس سے بھارتی پائلٹ کی ایک تیسری ویڈیو سامنے آئی۔

اس ویڈیو میں بھارتی پائلٹ پاک فوج کے کسی میجر سے بات چیت کر رہا ہے۔ وہ کہتا ہے کہ پاک فوج کے جس کیپٹن نے اسے ہجوم سے بچایا اس سے لے کر دیگر افسران تک سب نے پیشہ وارانہ رویے کا مظاہرہ کیا اور وہ یہ بات ریکارڈ پر لا رہا ہے بھارت جا کر بیان تبدیل نہیں کرے گا۔ ونگ کمانڈر ابھے نندن کا کہنا تھا کہ وہ توقع کرتا ہے کہ بھارتی فوج بھی ان حالات میں ایسا ہی برتائو رکھتی۔

بھارتی پائلٹ نے اپنا نام اور رینک بتایا تاہم جب اس سے پوچھا گیا کہ وہ کون سے طیارہ اڑا رہا تھا تو اس نے کہا کہ وہ نہیں بتا سکتا لیکن یقیناً پاکستانی فوج نے ملبہ ڈھونڈ لیا ہوگا۔ اس نے اپنے مشن کے بارے میں بھی بتانے سے انکار کیا۔

بھارتی پائلٹ کا کہنا تھا کہ اس کا تعلق جنوبی بھارت سے ہے مزید تفصیلات وہ نہیں بتا سکتا۔ یاد رہے کہ اس سے پہلے خبریں آئی تھیں کہ گرفتار پائلٹ بھارتی فضائیہ کے سابق ایئرمارشل ایس کا بیٹا ہے۔

Copyright © 2024 Ummat Digital. All Rights Reserved