سلیکٹڈ وزیراعظم کا وژن لباس کی طرح تبدیل ہوتا ہے،سعید غنی

اسلام آباد  : رہنما پاکستان پیپلز پارٹی  سعید غنی نے وزیراعظم عمران خان کو تنقید کا نشانہ بناتے ہوئے کہاکہ سلیکٹڈ وزیراعظم کا ’’وژن‘‘ لباس کی طرح تبدیل ہوتا ہے۔

تفصیلات کے مطابق صوبائی وزیر بلدیات سندھ سعید غنی نے وزیر اعظم عمران خان کے ٹوئٹر پر جاری کردہ بیان پر ردعمل دیتے ہوئے  کہنا تھا کہ بلند عمارتیں ہوں، بڑے لان ہوں کی باتوں سے غریب کا پیٹ نہیں بھرتا، بنی گالہ کی شان و شوکت کی خاطر کچی جھگیاں مٹائی گئیں، لاکھوں لوگوں کو گھر کی چھت سے محروم کیا گیا،عمران خان چاہتے ہیں کہ پر کشش اور بلند عمارتوں کے سائے میں کسی غریب کی جھونپڑی نظر نہ آئے، ان کی جھونپڑیاں مسمار کرکے پرکشش لان بنائے جائیں۔

انہوں نے کہاکہ عمران خان کے وژن نے زراعت کو برباد کر دیا ہے، کاشتکار اپنی فصل کی مناسب قیمت نہ ملنے پر اپنی فصلیں جلا رہے ہیں،جب کسانوں کو اپنی محنت کا پھل نہیں ملے گا تو وہ کیسے ملک کو خوراک میں خودکفیل کریں گے؟۔