اختر مینگل کی اپوزیشن میں شمولیت کی پیشکش۔بلاول نے مذاکرات کیلیے کمیٹی بنا دی

پیپلز پارٹی کے چیئرمین بلاول بھٹو زرداری نے حکومتی اتحادی بلوچستان نیشنل پارٹی (بی این پی) مینگل کی اپوزیشن میں شمولیت کی پیشکش پر مذاکرات کے لیے چار رکنی کمیٹی بنا دی۔

تفصیلات کے مطابق بی این پی مینگل سے مذاکرات کے لیے قائم کمیٹی میں خورشید شاہ، نیئر بخاری، راجہ پرویز اشرف اور فرحت اللہ بابر شامل ہیں۔

بلاول بھٹو کے پولیٹیکل سیکریٹری جمیل سومرو نے کمیٹی کے قیام کا نوٹیفیکیشن جاری کردیا۔ کمیٹی بی این پی مینگل سے حکومتی اتحاد چھوڑ کر اپوزیشن میں شمولیت کے لیے مذاکرات کرے گی۔

ذرائع کے مطابق اختر مینگل نے بلاول بھٹو کو مذاکراتی کمیٹی کے قیام کے لیے پیغام بھجوایا تھا اور مطالبات کی حمایت کے بدلے اپوزیشن میں شمولیت کی پیشکش کی تھی۔

اخترمینگل نے پیغام بھیجا تھا کہ اپوزیشن ہمارے مطالبات پر ہمارے ساتھ تحریری معاہدہ کرے، مذاکرات کامیاب ہونے کی صورت میں بی این پی مینگل اپوزیشن اتحاد کا حصہ بن جائے گی۔