موجودہ حکمران کشمیر کو بییچ چکے ہیں۔مولانا فضل الرحمن

جمعیت علمائے اسلام (ف) کے سربراہ مولانا فضل الرحمن کا کہنا ہے کہ ہم پرایسے حکمران مسلط ہیں جن کومعلوم ہی نہیں کہ کشمیرکا مسئلہ کیا ہے۔

مظفر آباد میں جلسے سے خطاب کرتے ہوئے جے یو آئی کے سربراہ مولانا فضل الرحمان کا کہنا تھا کہ 70 سال سے کشمیریوں کو پاکستان کا راستہ دکھایا گیا لیکن ہمارے حکمرانوں کی پالسییوں کی وجہ سے ہم ایک قدم بھی آگے نہیں بڑھے، ہم پر ایسے حکمران مسلط ہیں جن کومعلوم ہی نہیں کہ کشمیر کا مسئلہ کیا ہے۔

مولانا فضل الرحمن کا کہنا تھا کہ مودی سرکار کے 5 اگست کے اقدام نے ایک نئے تنازع کو جنم دیا، پاکستان کی حکومت کیسے کہہ سکتی ہے کہ یہ اچانک ہوا اورہمیں پتہ نہیں ؟ حالانکہ آرٹیکل 370 کو ختم کرنا تو بی جے پی کا منشوراوران انتخابی مہم کا حصہ تھا،اور میرے ملک کا ناجائر حکمران کہتا رہا کہ مودی آئے گا اور کشمیر کا مسئلہ حل کرے گا۔

سربراہ جے یو آئی نے کہا کہ پاکستان کے حکمرانوں کو مسئلے کا پتہ ہی نہیں یہ کشمیر کو بیچ چکے ہیں، ہمارےحکمران آرٹیکل 370 کے خاتمے  پراحتجاج سے گریزاں ہیں، تعجب کی بات ہے کہ پاکستان کے حکمران ریاست کا موقف پیش کرتے ہیں تو آرٹیکل 370 کے خاتمے پراطمینان بھی کرتے ہیں، پھر کہتے ہیں کہ ہم نے کشمیر کا مسئلہ سلامتی کونسل میں اٹھایا، اس میں ان کا کیا کردار؟  یہ سب تو چین نے کیا۔

مولانا فضل الرحمن کا کہنا تھا کہ عمران خان کی حکومت اب نہیں بچے گی، یہ شاید پہلے حکمران ہیں جن کی رہنمائی پر قوم شرمندہ ہے، پورا ملک ناجائز حکومت کے خاتمے کے لیے اسلام آباد آئے گا اور ناجائز حکومت سے آزادی حاصل کرنے تک جد وجہد جاری رہے گی۔