پاکستان اور سری لنکا کے درمیان دوسرا ون ڈے آج کھیلا جائے گا

پاکستان اور سری لنکا کے درمیان دوسرا ون ڈے میچ آج کراچی کے نیشنل اسٹیڈیم میں دو پہرتین بجے  کھیلا جائے گا، تمام تیاریاں مکمل کر لی گئی ہیں، شائقین پرجوش ہیں تاہم منسوخ ہونے والے میچ کی ٹکٹوں سے متعلق بھی پاکستان کرکٹ بورڈ نے شائقین کرکٹ کو سہولت فراہم کردی ہے ۔

تفصیلات کے مطابق 27 ستمبر کو پاکستان اور سری لنکا کے درمیان پہلا و ن ڈے میچ شدید بارش کے باعث منسوخ کر دیا گیا تھا تاہم دوسرے میچ کے دن میں بھی تبدیلی کرتے ہوئے ایک روزآگے کردیا گیا جوآج نیشنل اسٹیڈیم میں کھیلا جائے گا۔

منسوخ ہونے والے میچ کی تمام تر ٹکٹیں فروخت ہو چکی تھیں جس پراب پاکستان کرکٹ بورڈ نے شائقین کرکٹ کو خوشخبری سناتے ہوئے کہا کہ منسوخ ہونے والے میچ کی ٹکٹیں دوسرے یا تیسرے ون ڈے میچ میں استعمال کی جا سکتی ہیں ۔

شائقین کرکٹ آج 10 سال کے بعد سری لنکا کی ٹیم کو نیشنل اسٹیڈیم میں ان ایکشن دیکھیں گے۔