سیاسی بونے مولانا کو ڈھال کے طور پر استعمال کر رہے ہیں۔.فردوس عاشق اعوان

وزیرِ اعظم عمران خان کی معاونِ خصوصی برائے اطلاعات ڈاکٹر فردوس عاشق اعوان کا کہنا ہے کہ مولانا فضل الرحمٰن نے ہمیشہ مفادات کی سیاست کی ہے، قوم اُن کی خواہشات کی بھینٹ نہیں چڑھے گی۔

لاہور میں میڈیا سے گفتگو کرتے ہوئے معاونِ خصوصی فردوس عاشق اعوان نے کہا کہ قوم مفاد پرست اور مذہب کا نام استعمال کرنے والوں کو پہچان چُکی ہے، سیاسی بونے مولانا کو ڈھال کے طور پر استعمال کر رہے ہیں۔

فردوس عاشق اعوان کا کہنا تھا کہ چین نے ہر مشکل وقت میں پاکستان کا ساتھ دیا ہے، وزیرِ اعظم عمران خان کا دورہ سی پیک اور دیگر امور پر پیش رفت کے لیے اہم ثابت ہوگا۔

وزیرِ اعظم کی معاون خصوصی کا کہنا تھا کہ نیشنل ایکشن پلان کے تحت مدرسہ اصلاحات بھی لائی گئی ہیں، معاشی محاذ پر ملک مثبت سمت میں آگے بڑھ رہا ہے، مذہبی سیاحت کو بھی فروغ دیا جا رہا ہے۔

اُن کا کہنا تھا کہ مولانا فضل الرحمٰن کو ناکامی ہوگی اور حکومت اپنی مدت پوری کرے گی۔