پاک فوج میں اہم عہدوں پر تبدیلیاں

پاک فوج میں اہم عہدوں پرتقرریاں اور تبادلے کردیے گئے جس کے مطابق دو میجرجنرل کو لیفٹیننٹ جنرل کے عہدے پر ترقی دی گئی جبکہ لیفٹیننٹ جنرل ساحر شمشاد مرزا کو چیف آف جنرل اسٹاف مقررکردیا گیا۔

پاک فوج کے شعبہ تعلقات عامہ (آئی ایس پی ار) کی جانب سے جاری بیان کے مطابق دو میجرجنرلز کو لیفیٹننٹ جنرل کے عہدے پرترقی دے دی گئی، میجر جنرل علی عامراعوان اور میجر جنرل محمد سعید کو لیفٹیننٹ جنرل کے عہدے پر ترقی دی گئی ہے۔

آئی ایس پی آرکے مطابق لیفٹیننٹ جنرل ساحر شمشاد مرزا کو چیف آف جنرل اسٹاف تعینات کردیا گیا ہے۔ وہ یہ عہدہ لیفٹیننٹ جنرل ندیم رضا کے بعد سنبھالیں گے جنہیں گزشتہ دنوں چیئرمین جوائنٹ چیف آف اسٹاف کمیٹی مقررکیا گیا ہے۔

 اس کے علاوہ لیفٹننٹ جنرل ندیم ذکی منج کو ڈائریکٹر جنرل اسٹریٹجک پلانز ڈویژن (ڈی جی ایس پی ڈی) مقررکردیا گیا ہے۔

ترجمان پاک فوج کے مطابق لیفٹیننٹ جنرل محمد عامرکو ایڈجوٹنٹ جنرل تعینات کیا گیا ہے جبکہ لیفٹیننٹ جنرل شاہین مظہر محمود کو کمانڈر منگلا کوراور لیفٹیننٹ جنرل نعمان محمود کو کمانڈر پشاورکور تعینات کیا گیا ہے۔