لاہور۔رکشےمیں بم دھماکا۔7افراد زخمی،3 موٹرسائیکل تباہ

لاہورکے علاقہ چوبرجی موڑ سمن آبادمیں رکشہ میں زوردار دھماکہ ہوا جس کے نتیجے میں7افراد زخمی جبکہ تین موٹرسائیکل تباہ ہوگئے۔

اطلاعات کے مطابق ایک بچے کی حالت تشویشناک ہے۔دھماکے سے ہر طرف تباہی پھیل گئی ۔اور دھماکے کی آواز دوردورتک سنی گئی۔

نجی ٹی وی کے مطابق جائے وقوعہ سے بال بیئرنگ اور لوہے کے ٹکڑے بھی ملے ہیں۔پولیس کے مطابق واقعہ سمن آباد کی حدود میں پیش آیا ہے جہاں ایک رکشہ میں زور داردھماکہ ہوا ہے۔دھماکے کی آوازیں دور دور تک سنی گئی ہیں جبکہ لوگوں میں خوف و ہراس پھیل گیا۔

پولیس کی ابتدائی تحقیقات کے مطابق دھماکہ بارودی مواد سے ہوا جس میں3 سے4 کلو مواد استعمال کیاگیاتھا۔

ایس پی سول لائنز کے مطابق رکشہ ڈرائیور نے بتایا کہ اس نے سواری کو شیراکوٹ سے اٹھایاتھا۔جب  وہ سمن آباد کے قریب پہنچے تو مشکوک شخص بیت الخلا جانے کا کہہ کراتر گیا جیسے ہی وہ اتر کرگیادھماکہ ہوگیا۔

دوست محمد خان نے میڈیا سے گفتگو میں کہا ہے کہ رکشہ ڈرائیور کی شناخت رمضان کے نام سے ہوئی جس نے ایک سواری شیراکوٹ سے بٹھائی اور سمن آباد کے قریب اتارا۔

انہوں نے بتایا کہ مسافرکواتارنے کے بعد رکشہ ڈرائیور پونچھ روڈ کے قریب رکشہ روک کر نیچے اترا اور اس کے فوری بعد دھماکہ ہوگیا۔

دھماکے کے نتیجے میں رکشہ ڈرائیور اور خاتون سمیت7افراد زخمی ہیں۔ ان کا مزید کہنا تھا کہ رکشہ ڈرائیور رمضان کی حالت خطرے سے باہر ہے۔