نعیم الحق پاکستان کرکٹ ٹیم کی ناقص کارکردگی پر پھٹ پڑے

وزیراعظم عمران خان کے معاون خصوصی برائے سیاسی امور نعیم الحق آسٹریلیا میں پاکستان کرکٹ ٹیم کی ناقص کارکردگی پر پھٹ پڑے،لکھا کہ ٹیم کی کارکردگی بہتر ہونے کی ذرا بھی امید نظر نہیں آرہی۔

سماجی رابطوں کی ویب سائٹ ٹوئٹر پر جاری پیغام میں نعیم الحق نے لکھا کہ آسٹریلیا میں ہماری ٹیم کی مسلسل خوفناک کارکردگی کوچ/ چیف سلیکٹر کی تبدیلی کا تقاضا کرتی ہے۔

خیال رہے کہ پاکستان کرکٹ بورڈ نے سابق کپتان مصباح الحق کو قومی کرکٹ ٹیم کا ہیڈ کوچ اور چیف سلیکٹر مقرر کررکھا ہے۔

ورلڈ کپ کے بعد مکی آرتھر کو ہیڈ کوچ اورانضمام الحق کو چیف سلیکٹر کے عہدے سے ہٹایا گیا تھا جس کے بعد یہ دونوں اہم عہدے مصباح کو دے دیے گئے۔مصباح الحق کی منتخب کردہ ٹیم کا پہلا امتحان سری لنکا کیخلاف ہوم سیریز تھی جس میں پاکستان نے 0-2 سے ون ڈے سیریز جیتی تھی جبکہ ٹی ٹوئنٹی سیریز میں پاکستان کو 0-3 سے شکست کا سامنا کرنا پڑا تھا۔