سعودی حکومت نے پاکستان کو اہم پیشکش کردی

ترجمان دفتر خارجہ کے مطابق وزیراعظم عمران خان نے سعودی علی عہد محمد بن سلمان سے ملاقات کی جس میں باہمی دلچسپی کے مختلف امور، پاک عرب تعلقات  سمیت خطے کی مجموعی صورتحال پر گفتگو ہوئی۔

وزیر اعظم عمران خان کی سعودی ولی عہد شہزادہ محمد بن سلمان سے ریاض میں ملاقات۔ پاک سعودی دو طرفہ تعلقات اور خطے کی مجموعی صورتحال پر تبادلہ خیال۔ pic.twitter.com/xUOCDs1cr3

— Government of Pakistan (@GovtofPakistan) December 14, 2019

جاری کردہ اعلامیے کے مطابق وزیر اعظم نے دونوں ممالک کے درمیان اسٹریٹجک تعلقات کی اہمیت، پاک سعودی تعلقات، خطہ میں امن و استحکام، مشرق وسطی کے تنازعات کو سیاسی اور سفارتی ذرائع سے حل کرنے پر زور دیا۔

وزیراعظم عمران خان نے کہا کہ پاکستان مشرق وسطی میں تنازعات ختم کرنے اور تناؤ کم کرنے میں کردار ادا کرتا رہے گا، پاکستان خطے اور دنیا کے امن کے لیے تمام تر کوششوں میں مدد فراہم کرتا رہے گا۔

اعلامیے کے مطابق دورے کے دوران سعودی عرب نے پاکستان میں سیاحت کے شعبے کی ترقی میں ہر ممکن تعاون کی پیشکش کی، سیاحت کے فروغ سے متعلق سعودی ٹیم جلد پاکستان کا دورہ کرے گی۔

اعلامیے میں کہا گیا ہے کہ مئی 2019ء کے بعد وزیر اعظم عمران خان کا سعودی عرب کا یہ چوتھا دورہ تھا، مسلسل روابط اس اسٹریٹجک شراکت داری کی اہمیت کی عکاسی کرتے ہیں، اعلامیہ دونوں ممالک کی قیادت پاکستان سعودی تعلقات کو ایک نئی سطح پر لے جانے کے لیے پرعزم ہے۔

وزیر اعظم عمران خان نے جی 20 کی صدارت ملنے پر سعودی ولی عہد کو مبارکباد دی اور کہا کہ یہ سعودی قیادت کا عالمی کمیونٹی میں کردار کا عکس ہے، ولی عہد محمد بن سلمان کا رواں سال فروری میں دورہ پاکستان انتہائی اہم رہا جس میں سرمایہ کاری، توانائی، سلامتی اور دفاع کے شعبوں میں تعاون کے نئے دور کا آغاز ہوا۔

ملاقات میں رہنماؤں نے دونوں ممالک کے درمیان دو طرفہ تعاون پراطمینان کا اظہاراوراتفاق کیا کہ سعودی پاکستان سپریم کوآرڈی نیشن کونسل کے قیام نے باہمی تعاون کو مزید مضبوط کیا اس لیے آئندہ سال کونسل کے دوسرے اجلاس میں کوآرڈی نیشن کو مزید مضبوط بنایا جائے گا۔