راولپنڈی۔پی پی جلسہ گاہ کے قریب سے 2مشتبہ افراد گرفتار

پولیس نے پاکستان پیپلزپارٹی کے لیاقت باغ میں جلسے کیلیے مختص کی گئی جگہ کے قریب سے دو مشتبہ افراد کو گرفتارکرلیاگیاہے۔پولیس کے مطابق گرفتارافراد کو متعلقہ تھانے منتقل کردیا گیا۔

واضح رہے کہ پاکستان پیپلز پارٹی کی جانب سے آج لیاقت باغ میں بے نظیر بھٹو کی برسی کی مرکزی تقریب کا انعقاد کیاجارہاہے۔اس حوالے سے سیکیورٹی کے بھی سخت انتظامات کیے گئے ہیں اور پولیس حکام کے مطابق دوہزار سے زائد اہلکاروں کو جلسہ گاہ کی حفاظت کیلئے تعینات کیاگیاہے۔

سی سی پی اوکے مطابق بلند وبالا عمارتوں اورمیٹرو ٹریک پر سنائپرز تعینات کیے گئے ہیں، جلسہ گاہ میں داخلے کے لیے چار چیکنگ گیٹس بنائے گئے ہیں۔جلسے میں شرکت کیلیے ملک بھرسے قافلوں کی بڑی تعداد لیاقت باغ پہنچ رہی ہے۔

واضح رہے کہ پاکستان پیپلز پارٹی کی سابق سربراہ اور سابق وزیراعظم بے نظیر بھٹو لیاقت باغ میں ایک جلسہ کے دوران قاتلانہ حملے کا شکار ہوئی تھیں۔

ان کی بارہویں برسی کے موقع پر پیپلز پارٹی نے اسی مقام پر جلسے کااعلان کیاہے جہاں بےنظیر بھٹو کو شہید کیاگیاتھا۔جلسے سے پیپلز پارٹی کے شریک چیئرمین بلاول بھٹو زرداری خطاب کریں گے جبکہ پی پی رہنمائوں کی بڑی تعداد کی آمد متوقع ہے۔