پیپلزپارٹی نے لیاقت باغ راولپنڈی میں پنڈال سجا لیا

سابق وزیراعظم پاکستان محترمہ بے نظیر بھٹو شہید کی بارویں برسی پر پیپلزپارٹی نے لیاقت باغ راولپنڈی میں پنڈال سجا لیا، کچھ دیر بعد جلسے کا باقاعدہ آغاز ہوگا۔

پیپلز پارٹی کی جانب سے پہلی بار مرکزی تقریب گڑھی خدا بخش کے بجائے جائے شہادت لیاقت باغ راولپنڈی میں منعقد کی جا رہی ہے۔ چیئرمین پاکستان پیپلز پارٹی بلاول بھٹو زرداری برسی کی تقریب سے خطاب کریں گے۔

جلسے  کے لیے دو اسٹیج بنائے گئے ہیں۔ ایک پر بلاول بھٹو مرکزی قیادت کے ہمراہ جبکہ دوسرے پر پیپلز پارٹی کے دیگر رہنما موجود ہوں گے۔

مرکزی اسٹیج 100 فٹ اور 60 فٹ چوڑا ہے۔ اسٹیج، جلسہ گاہ اور داخلی راستوں کے علاوہ مری روڈ کو خیر مقدمی بینروں سے سجا دیا گیا ہے۔

انتظامیہ کے مطابق جلسہ گاہ کے اندر اور باہر 3 ہزار سے زائد سیکیورٹی اہلکار تعینات ہوں گے جبکہ مری روڈ کمیٹی چوک سے لے کر مریڑ چوک تک ہرطرح کی ٹریفک کے لیے بند ہو گی۔ اس حوالے سے ٹریفک پولیس نے متبادل پلان جاری کر دیا ہے۔