قومی ایئر لائن کی پرواز میں ریسلنگ۔مسافرگتھم گتھاہوگئے

قومی ایئر لائن(پی آئی اے) کی پرواز پی کے 786 میں 2مسافرگتھم گتھاہوگئے،کپتان نے ہیتھروائیرپورٹ پرکنٹرول ٹاورسے رابطہ کرکے پولیس طلب کرلی،لند ن پولیس نے طیارے میں سوار دونوں مسافرو ں کو گرفتارکرلیا،پی آئی اے نے دونوں مسافروں کو بلیک لسٹ کردیا۔

ترجمان پی آئی اے کے مطابق لندن سے اسلام آباد آنے والی پرواز پی کے 786 میں 2 مسافروں کی ہنگامہ آرائی کے باعث دونوں مسافروں کو لندن پولیس نے گرفتار کرلیا۔ دونوں مسافر نشے میں تھے اور دیگرمسافروں کو پریشان کررہے تھے، نشے میں دھت دونوں مسافر آپس میں لڑ پڑے اور بات ہاتھا پائی تک پہنچ گئی جس پر مسافروں نے فضائی میزبان سے شکایت کی۔

ترجمان پی آئی اے نے کہا کہ دونوں مسافر نشے میں تھے ،پروازکی روانگی میں ایک گھنٹے تاخیرکی ہوئی ،پی آئی اے نے دو نوں مسافروں کو بلیک لسٹ کردیا۔