کوئٹہ میں بم دھماکے سے2افراد جاں بحق،15زخمی ہوگئے

کوئٹہ میں میکانگی روڈ پر سیکیورٹی فورسز کی گاڑی کے قریب دھماکے سے2افراد جاں بحق اور15 زخمی ہوگئے۔

میڈیا رپورٹس کے مطابق کوئٹہ میں مصروف ترین علاقے میکانگی روڈ پر سیکیورٹی فورسزکی گاڑی معمول کے گشت پر تھی، جب ایک خاص مقام پر یہ گاڑی پہنچی تو زورداردھماکہ ہوا، دھماکہ اس قدر شدید تھا کہ اس کی آواز دور دور تک سنائی دی ،قریبی عمارتوں کے شیشیے ٹوٹ گئے۔

دھماکے کی اطلاع ملتے ہی سیکیورٹی فورسز، ریسکیواور بم ڈسپوزل اسکواڈ کی ٹیمیں دھماکے کی جگہ پر پہنچ گئیں اورعلاقے کو گھیرے میں لے کرامدادی کارروائیاں شروع کردیں۔

ریسکیو حکام نے دھماکے میں زخمی ہونے والے 15 افراد کو سول ہسپتال کوئٹہ منتقل کردیا جہاں دوزخمی دوران علاج دم توڑ گئے۔دھماکے سے ایک موٹر سائیکل اورایک گاڑی تباہ ہوگئی۔

پولیس کے مطابق دھماکہ سیکیورٹی فورسزکی گاڑی کے قریب ہوا۔سیکیورٹی فورسزنے علاقے کو گھیرے میں لے لیا ہے،واقعے کے بعد علاقے میں ٹریفک جام ہو گیا ہے۔

ذرائع کا کہنا ہے کہ یہ دھماکا کوئٹہ کے انتہائی حساس علاقہ میں ہوا جس میں دہشت گردوں نے سیکیورٹی فورسز کی گاڑی کو نشانہ بنانے کی کوشش کی۔ جائے وقوعہ سے شواہد اکٹھے کیے جا رہے ہیں۔