وزیر خارجہ شاہ محمود قریشی ایران پہنچ گئے

وزیراعظم عمران خان کی ہدایت پر وفاقی وزیر خارجہ شاہ محمود قریشی ایران اور امریکہ کے درمیان کشیدگی کم کرنے کیلیے کردارادا کرنے کیلیے ایران پہنچ گئے جہاں وہ قاسم سلیمانی کی ہلاکت کے بعد پیدا ہونے والی کشیدہ صورتحال پرایرانی قیادت سے اہم ملاقاتیں کریں گے۔

زیر خارجہ شاہ محمود قریشی ایران کے شہر مشہد کے ہوائی اڈے پر پہنچے تو ڈپٹی گورنر جنرل صوبہ خراسان رضاوی محمد صادق, پاکستان کے قونصل جنرل عرفان محمود بخاری اور قونصل خانے کے حکام نے وزیر خارجہ کا پرتپاک خیر مقدم کیا۔

وزیر خارجہ مشہد میں امام رضا علیہ السلام کے روضہ مبارک پرحاضری دیں گے، حاضری کے بعد وزیر خارجہ وفد کے ہمراہ مشہد سے تہران روانہ ہوں گے۔

خیال رہے کہ شاہ محمود قریشی وزیراعظم عمران خان کی ہدایت پر مشرق وسطیٰ میں کشیدگی کے خاتمے میں اپنا کردار ادا کرنے کیلیے ایران پہنچے ہیں اس کے بعد وزیر خارجہ سعودی عرب جائیں گے۔