شبرزیدی کا طویل رخصت پرجانے کا فیصلہ

چیئرمین فیڈرل بورڈ آف ریونیوشبرزیدی نے طبی بنیادوں پر طویل رخصت پرجانے کا فیصلہ کرلیا۔

نجی ٹی وی کے مطابق ڈاکٹروں نے شبرزیدی کو آرام کا مشورہ دیا ہے اور وہ 3 فروری سے رخصت پر جائیں گے۔ اس سے قبل بھی چیئرمین ایف بی آر6 سے 19جنوری 2020 کے دوران خراب صحت کے سبب رخصت پر تھے۔

شبر زیدی 21 جنوری کو ہی چھٹیوں سے واپس آئے ہیں اوران کی جگہ 22ویں گریڈ کا افسر قائمقام چیئرمین کے فرائض انجام دے رہا تھا۔

ذرائع کے مطابق چیئرمین ایف بی آر غیر معینہ مدت کیلیے چھٹیوں پر جا رہے ہیں اور انہوں متعلقہ حکام کو اس کے بارے میں مطلع کر دیا ہے۔اطلاعات کے مطابق شبرزیدی ایک ہفتے سے دفتر نہیں آرہے اور نہ 21 جنوری کے بعد کسی معاملے پر کارروائی آگے بڑھائی ہے۔

ذرائع ابلاغ میں چلنے والی خبروں کے مطابق چیئرمین کی عدم دلچسپی کے سبب ادارے میں غیریقینی پائی جارہی ہے کہ وہ کام جاری رکھیں گے یا نہیں۔

خیال رہے کہ ایف بی آر مالی سال2019-20 کی پہلی ششماہی میں محصولات جمع کرنے کا ہدف حاصل نہیں کرسکا۔

ایف بی آر نے صرف287 ارب روپے جمع کیے ہیں جبکہ ہدف 2.367 کھرب رکھا گیا تھا۔باخبر ذرائع کا یہ بھی کہنا ہے کہ وزیراعظم کے مشیربرائے مالیات ڈاکٹرحفیظ چیئرمین ایف بی آر کو کہہ چکے ہیں ناقص کارکردگی والے افسران کو گھر بھیجا جائے تاہم کسی کو کام سے روکا نہیں گیا۔