محکمہ صحت سندھ کے دفاتر میں شہریوں کے داخلے پر پابندی

محکمہ صحت سندھ نے دفاتر میں شہریوں کےداخلے پر پابندی عائد کردی۔

ہم نیوز کے مطابق سندھ سیکریٹریٹ میں محکمہ صحت کے تمام دفاتر میں ملازمین کے علاوہ دیگرافراد کا داخلہ بند کردیا گیا ہے۔

دوسری جانب گورنر سندھ عمران اسماعیل نے کہا ہے کہ پاکستان سپر لیگ (پی ایس ایل) کے تمام میچز شیڈول کے مطابق ہوں گے۔

کراچی کے علاقے کھارادر اسپتال میں میڈیا سے بات کرتے ہوئے گورنر سندھ نے کہا کہ پی ایس ایل کے میچز کے دوران گراؤنڈز کو سینیٹائز کیا جا سکتا ہے۔

اس سے قبل میڈیا رپورٹس میں بتایا جارہا تھا کہ وزارت صحت سندھ نے صوبے میں کرونا وائرس سے بچاؤ کے لیے پی ایس ایل 2020 سمیت دیگرعوامی اجتماعات پر پابندی لگانے پرغورشروع کردیا ہے۔

کراچی میں وزیر صحت سندھ کی زیرصدارت اجلاس ہوا جس میں فیصلہ کیا گیا کہ ایئرپورٹ پر اسکریننگ کے لیے ہیلپ ڈیسک اورتمام نجی اورسرکاری اسپتالوں میں بھی فرنٹ لائن ڈیسک قائم کیا جائے گا۔محکمہ صحت سندھ آج عوامی اجتماعات کے حوالے سے ایڈوائزری بھی جاری کرے گا۔