ملک بھر میں نادرا کے دفاتر کھل گئے، لوگوں کی لمبی قطاریں

ملک بھر میں نادرا کے دفاتر کھل گئے، لوگوں کی لمبی قطاریں لگ گئیں، شناختی کارڈ کی وصولی کیلیے 15 مئی کے بعد رجوع کرنا ہوگا۔

ترجمان نادرا کے مطابق نئی رجسٹریشن اور بائیومیٹرک تصدیق کرانے والے سائلین کو ترجیح دی جائے گی، زائد المیعاد شناختی کارڈ کی مدت رواں سال جولائی تک بڑھا دی گئی ہے۔ شناختی کارڈ کی فراہمی سے متعلق معلومات کیلیے نادرا دفاتر آنے سے پہلے 8400 پر میسج کرنا ہوگا۔

سنٹر میں داخلے کیلیے ماسک لگانا، درجہ حرارت چیک کروانا، ہاتھوں پر سینی ٹائزر لگوانا لازمی قرار دیا گیا ہے۔ ایسے سائلین جن کا نام احساس کفالت پروگرام میں آگیا ہے مگران کی فنگر پرنٹس تصدیق نہ ہونے کی وجہ سے انکو امداد نہیں مل رہی، ان کا پراسس کیا جائے گا تاکہ ان کو احساس کفالت پروگرام کے تحت ملنے والی امداد مل سکے۔

نادرا ترجمان کا مزید کہنا تھا کہ شناختی کارڈ کی وصولی کیلیے آنیوالے سائلین 15 مئی کے بعد رجوع کریں۔ سائلین رش اور دھوپ سے بچنے کیلیے نادرا آن لائن رجسٹریشن ویب سروس www.id.nadra.gov.pk کا استعمال کریں۔

واضح رہے کہ ملک بھرمیں جاری لاک ڈاؤن کے باعث نادرا دفاترکوبھی حفاظتی اقدام کے پیش نظربند کردیا گیا تھا۔