وزیرستان میں غیرت کے نام پر دو لڑکیاں قتل

خیبرپختونخوا کے اضلاع جنوبی و شمالی وزیرستان کے سرحدی گائوں میں نوجوان شخص کے ساتھ موبائل ویڈیو سوشل میڈیا پر وائرل ہونے کے بعد 2 لڑکیوں کو مبینہ طورپرگھرکے ایک فرد کی جانب سےغیرت کے نام پر قتل کردیا گیا۔

نجی ٹی وی کی رپورٹ مطابق شمالی وزیرستان میں رزمک پولیس اسٹیشن، جس کی حدود میں یہ واقعہ پیش آیا وہاں جمعہ 15 مئی کو ریاست کی مدعیت میں ایف آئی آر درج کرکے تحقیقات شروع کردی گئیں۔

واقعہ 14 مئی کو خیرپختونخوا میں شمالی اور جنوبی وزیرستان کے سرحدی گائوں شام پلین گڑیوم میں دوپہر 2 بجے کے قریب پیش آیا۔ایس ایچ او کی جانب سے درج کی گئی ایف آئی آرکے مطابق شام پلین گڑیوم میں چچا زاد بھائی کی جانب سے 16 اور18 برس کی 2 لڑکیوں کے غیرت کے نام پر قتل کی مصدقہ اطلاع موصول ہوئی تھی جن کا نام اور پتہ معلوم نہیں۔

غیرت کے نام پر قتل کی وجہ ایک ویڈیو بتایا جارہا ہے ، جس میں ایک نوجوان کو باہر ویران علاقے میں 3 لڑکیوں کے ساتھ اپنی ویڈیو بناتے ہوئے دیکھا گیا۔وزیرستان کے سینئر پولیس افسر نے واقعے کی تصدیق کی اور ڈان ڈاٹ کام کو بتایا کہ 52 سیکنڈ پر مشتمل موبائل ویڈیو کلپ میں نظر آنے والی 3 میں سے 2 لڑکیوں کو قتل کردیا گیا ہے۔انہوں نے کہا کہ پولیس ویڈیو میں نظر آنے والے شخص اور تیسری لڑکی کی معلومات جمع کررہی ہے۔

پولیس عہدیدار کے مطابق یہ ویڈیو تقریباً ایک برس قبل بنائی گئی تھی اور ممکنہ طور پر چند ہفتے قبل سوشل میڈیا پر وائرل ہوئی۔انہوں نے تحصیلدار کی رپورٹ کا حوالہ دیتے ہوئے کہا کہ اب تک موصول ہونے والی اطلاعات کے مطابق تیسری لڑکی اورلڑکا زندہ ہیں۔

پولیس عہدیدار نے انکشاف کیا کہ واقعے کے بعد لاشوں کی تدفین کے لیے دونوں خاندانوں کے جنوبی وزیرستان میں آبائی گاوں شکوتئی منتقل ہونے کی اطلاعات ہیں۔