اپوزیشن کی آل پارٹیزکانفرنس عیدالاضحیٰ کے فوراً بعد ہوگی

اپوزیشن کی آل پارٹیزکانفرنس عیدالاضحیٰ کے فوراً بعد ہوگی اوراس کی میزبانی مسلم لیگ (ن) کے صدر شہباز شریف کریں گے۔

نجی تی وی کے مطابق اپوزیشن نے حکومت کے خلاف بھرپورتحریک کے لیے لائحہ عمل طے کرلیا۔ جس کے تحت عیدالاضحیٰ کے فوراً بعد اپوزیشن کی آل پارٹیز کانفرنس اسلام آباد میں ہوگی، جس کی میزبانی مسلم لیگ (ن) کے صدر شہباز شریف کریں گے۔ کانفرنس کی تاریخ کا حتمی اعلان بھی شہباز شریف کریں گے۔

اے پی سی میں مسلم لیگ (ن)، پیپلز پارٹی اور جے یو آئی سمیت تمام اپوزیشن جماعتیں شریک ہوں گی۔ کانفرنس میں بلوچستان نیشنل پارٹی کے صدر اختر مینگل بھی شریک ہوں گے۔

کانفرنس میں حکومت کی 2 سال کی کارکردگی اور معاشی صورتحال کو زیر بحث لایا جائے گا، کانفرنس میں نیب سمیت اپوزیشن کے خلاف حکومتی کارروائیوں کا جائزہ لیا جائے گا۔ اس کے علاوہ مجوزہ حکومتی آئینی ترامیم پر بھی غورکیا جائے گا۔

واضح رہے کہ پیپلز پارٹی کے چیئرمین بلاول بھٹو زرداری نے گزشتہ دنوں مسلم لیگ (ن)، جے یو آئی (ف) اور بی این پی مینگل کے سربراہ اختر مینگل سے بھی ملاقاتیں کی ہیں۔