کراچی میں موسلادھار بارش۔سڑکوں پر پانی جمع۔ٹریفک جام

کراچی کے مختلف علاقوں میں موسلا دھار بارش سے سڑکیں تالاب بن گئیں،بجلی معطل اور ٹریفک جام ہو گیا۔

نجی ٹی وی کے مطابق گلش معمار، سرجانی ٹائون اور نارتھ کراچی،گلشن اقبال، گلستان جوہر،یونیورسٹی روڈ ،فیڈرل بی ایریا،جناح اسپتال،صدر، اولڈ سٹی ایریا، آئی آئی چندریگر روڈ اوردیگرعلاقوں میں بارش  ہوتے ہی سڑکوں پر پانی جمع ہوگیا جبکہ شہرکے متعدد علاقوں میں بجلی کی فراہمی معطل ہوگئی۔

کورنگی،اورنگی ٹائون، ملیر،ڈیفنس، قیوم آباد،طارق روڈ،لیاقت آباد،ناظم آباد اوردیگرعلاقوں میں موسلا دھاربارش ہوئی۔

اس سے قبل محکمہ موسمیات کے مطابق اس وقت کراچی کا درجہ حرارت38ڈگری سینٹی گریڈ ہے،آج دوپہرکو شہر بھر میں گرج چمک کے ساتھ بارش متوقع ہے۔

محکمہ موسمیات نے شہر میں تین دن کے برسات کے اسپیل میں 100 سے 130 ملی میٹر بارش کا امکان ظاہرکیا ہے۔

ڈائریکٹر محکمہ موسمیات عبدالقیوم بھٹو نے بتایا کہ ہوا کا ایک کم دباؤ رن آف کچھ پربن چکا ہے،ہوا کا ایک اورکم دباؤ خلیج بنگال پر موجود ہے، آئندہ دو روزکے دوران یہ دونوں سسٹم بھارتی گجرات پر مل جائیں گے۔

ڈائریکٹر محکمہ موسمیات کا کہنا تھا کہ پچھلی بارشوں سے زیادہ بارشوں کا امکان ہے جس سے اربن فلڈنگ کا خطرہ بھی ہے۔