کراچی میں حکومت نے صرف بیانات سے کام لیا۔شہبازشریف

مسلم لیگ(ن) کے مرکزی صدر شہبازشریف نے کہا ہے کہ کراچی میں بارش کے بعد پیدا ہونے والے مسائل پر وفاقی حکومت نے صرف بیانات سے کام لیا اورعوام کو مشکلات میں چھوڑ دیا۔

لاہور میں ذرائع ابلاغ سے بات چیت کرتے ہوئے ان کا کہنا تھا کہ وفاقی حکومت نے صوبائی حکومت سے تعاون نہیں کیا۔

اپوزیشن لیڈر قومی اسمبلی کا کہنا تھا کہ بدقسمتی سے وفاق کی جانب سے لفاظی کرکے سیاست کی گئی، وفاق کو صوبے کی مدد کرنا چاہیے تھی تاکہ قوم اس عمل کی تحسین کرتی۔

شہبازشریف کا کہنا تھا کہ کراچی میں کاروباری افراد بھی سیلاب سے متاثر ہوگئے ہیں۔ سندھ حکومت اپنی طاقت کےمطابق کراچی میں کام کر رہی ہے۔ وزیراعظم کراچی کے مسائل کے حل کے لیے سندھ حکومت سے مشاورت کریں۔

شہباز شریف نے کراچی والوں کا شکریہ ادا کرتے ہوئے کہا کہ کراچی کی ترقی کا سفرمسلم لیگ ن عوام کے ساتھ مل کر طے کرے گی۔ کراچی کے عوام کو مسائل سے نجات دلانے کا وعدہ بھی پوراکریں گے۔

انہوں نے کہا کہ خیبرپختونخوا میں بھی سیلاب سے تباہ کاریاں جاری ہیں۔ وہاں بھی وفاقی اور صوبائی حکومت کی لاپرواہی قابل مذمت اور افسوسناک ہے۔

شہبازشریف نے خیبرپختونخوا میں طوفانی بارشوں سے تباہی پر اظہار افسوس کرتے ہوئے کہا کہ وہاں کےعوام کے مصائب کو فوری حل کیاجائے۔