طلبا کو کورونا سے متعلق حفاظتی تدابیر کیلیے آگاہی کتابچہ جاری

محکمہ پرائمری اینڈ سیکنڈری ہیلتھ کیئر کی جانب سے طلبا کو کورونا وائرس سے متعلق حفاظتی تدابیر اختیار کرنے کے لیے آگاہی کتابچہ جاری کردیا گیا۔

آؤ چلیں اسکول کورونا سے رہ کر محفوظ، محکمہ پرائمری اینڈ سیکنڈری ہیلتھ کیئر کی جانب سے جاری کردہ کتاب میں طلبا کو تمام حفاظتی تدابیر سے آگاہ کیا گیا ہے۔کتابچے میں طلبا کے لیے دلچسپ مشقیں بھی رکھی گئی ہیں۔

سیکریٹری پرائمری اینڈ سیکنڈری ہیلتھ کیئر کیپٹن ریٹائرڈ محمد عثمان کا کہنا ہے کہ کورونا وائرس کا خطرہ اب کم ہو گیا ہے اس لیے اسکول دوبارہ کھل رہے ہیں۔

انہوں نے کہا کہ کورونا ایک خطرناک وائرس ہے جس سے بچاؤ کے لیے احتیاط کی عادت اپنائیں اور طلبا کتاب میں دی گئی ہدایات پرعمل کریں۔

یاد رہے کہ وفاقی حکومت نے گزشتہ روزکورونا کے باعث بند اسکولوں کو 15 سمتبر سے مرحلہ وار کھولنے کا اعلان کیا ہے تاہم اسکولوں میں ایس او پیز پر سختی سے عملدرآمد کا حکم بھی دیا گیا ہے۔