مولانا عادل خان کے قتل کا مقدمہ شاہ فیصل تھانے میں درج

کراچی کے علاقے شاہ فیصل کالونی میں مولانا عادل خان اور ان کے ڈرائیور کے قتل کا مقدمہ شاہ فیصل تھانے میں درج کرلیا گیا۔

مقدمہ تھانہ شاہ فیصل کالونی کے ایس ایچ اوکی مدعیت میں قتل اورانسداد دہشتگردی کی دفعات کے تحت درج کیا گیا ہے۔ ایف آئی آرکے متن کے مطابق 15 کے ذریعے شمع شاپنگ سینٹر پر فائرنگ کی اطلاع موصول ہوئی۔ رات پونے 8 بجے اطلاع ملنے پر سات بج کر50 منٹ پر پولیس جائے وقوعہ پر موجود تھی۔

تین ملزمان جن میں سے ایک نے شلوار قمیض اور دو نے پینٹ شرٹ پہنچ رکھی تھی، گاڑی پرپستول سے فائرنگ کی اور موٹر سائیکل پر بیٹھ کر فرار ہو گئے۔

فائرنگ سے دو افراد زخمی ہوئے جنہیں ہسپتال بھیجاگیا تاہم وہ جانبر نہ ہو سکے اور خالق حقیقی سے جا ملے۔ جائے وقوعہ سے نائن ایم ایم گولیوں کے پانچ خول ملے تھے۔ مقدمہ درج ہونے کے بعد تفتیش سی ٹی ڈی منتقل کردی گئی۔